Amit Thackeray : मी संजय राऊतांची रिप्लेसमेंट नाही : अमित ठाकरे

Amit Thackeray Pune Tour : मनसे अध्यक्ष राज ठाकरे यांचे पुत्र अमित ठाकरे यांनी मला संजय राऊत यांची रिप्लेसमेंट नाही बरं का असं विधान केले आहे. पुणे दौऱ्यावर असताना त्यांनी आज पत्रकारांची अनौपचारिक संवाद साधला त्यावेळी ते बोलत होते. मी गृहमंत्री होणार ही अफवा होती, पण पुढचे २० दिवस मला पत्रकार याबाबतच विचारत होते. ही बातमी खोटी आहे, हे सांगून मी थकलो होतो. म्हणून मी म्हटलं गृहमंत्री पद दिलं तर आपण विचारू करू. मला राज ठाकरेंच्या मंत्रिमंडळात बसायला आवडेल, ते सांगतील तेच मी करेन असे त्यांनी यावेळी स्पष्ट केले.

सध्या मी विद्यार्थ्यांसाठी फिरतोय, त्यांच्याशी संवाद साधतोय, त्यांचे प्रश्न जाणून घेतोय. रोजगार, आरक्षण आणि स्पर्धा परीक्षा या समस्या विध्यार्थ्यांना भेडसावत आहेत. या सोडविण्यासाठी प्रत्येक महाविद्यालयात मनविसेची शाखा असायला हवी. यामुळं माझा आणि त्यांचा संपर्क व्हायला हवा, त्यासाठी मी सध्या प्रयत्नशील आहे. त्याचानुषंगाने मी हा दौरा करतोय.

मी जर राज ठाकरेंचा मुलगा नसतो तर राजकारणात कधीच आलो नसतो. मला लोकांसाठी काम करायला आवडतं. पण ही आवड असली तरी सध्याच राजकारण पाहता मी कधीच राजकारणात आलो नसतो. मात्र माझ्यासाठी राज साहेबानी प्लॅटफॉर्म तयार करून दिलंय. त्यामुळे दौरे करतोय अन युवकांचा प्रतिसाद मिळतोय. सत्ता बदलाचे मला काही वाटत नाही. मी बातम्या वाचतच नाही. माझं फोकस क्लिअर आहे. विद्यार्थ्यांचे प्रश्न सोडवायचे. यासाठी मी स्वतः विध्यार्थ्यांना उपलब्ध होईन. यासाठी माझा नंबर त्यांना देतोय.

अमित ठाकरे तुम्ही जाईल तिथं बोलायला हवं? बातमी द्यायला हवी असे पत्रकारांनी विचारले असता "संजय राऊत सगळं पुरवतात ना?" असा मिश्किल टोला ठाकरे यांनी लगावला. ते सध्या तुरुंगात आहेत ना?असा प्रश्न विचारल्यावर अमित ठाकरे म्हणाले, "मला संजय राऊत यांची रिप्लेसमेंट नाही बरं का." त्यांच्या या विधानाची सध्या जोरदार चर्चा सुरू आहे.