रस्त्यावर थुंकाल तर तुम्हालाच आता ते पुसावे लागेल

पुणे : रस्त्यावर थुंकाल तर तुम्हालाच आता ते पुसावे लागेल आणि शंभर रुपये दंड ही भरावा लागेल. सार्वजनिक ठिकाणी पान,गुटखा, तंबाखु घाऊन अस्वच्छता करणाऱ्या साठपेक्षा अधिक जणांवर महापालिकेने कारवाई केली आहे. 

महापालिकेच्या विविध क्षेत्रीय कार्यालयातंर्गत गेल्या तीन दिवसापासून रस्त्यावर थुकंणाऱ्यांवर कारवाई करण्यास सुरवात झाली आहे. बिबवेवाडी, टिळक रस्ता, औंध, विश्रांतवाडी क्षेत्रीय कार्यालयातील कर्मचाऱ्यांनी ही कारवाई केली आहे. महापालिकेच्या घन कचरा व्यवस्थापन विभागाने ही मोहीम राबविली आहे. या मोहिमेत उपायुक्त ज्ञानेश्‍वर मोळक हे देखील सहभागी झाले आहेत.

रस्त्यावर थुंकणे, सार्वजनिक ठिकाणी कचरा टाकणे, कचऱ्याचे वर्गीकरण करणे आदीसाठी महापालिका वेळोवेळी नागरीकांमध्ये जनजागृती करीत असते. त्यानंतरही नागरीकांकडून अस्वच्छता केली जाते. पुन्हा एकदा महापालिकेने जनजागृतीबरोबरच धडक कारवाई करण्याची भुमिका घेतली आहे. सर्व क्षेत्रीय कार्यालयाच्या भागांत कलापथकाच्या माध्यमातून जनजागृती केली जात आहे. 

तीन दिवसांपासून सुरू असलेल्या कारवाई बाबत मोळक यांनी माहिती दिली. " साठहून अधिक नागरिकांवर महापालिकेने कारवाई केली आहे. यामध्ये उच्च शिक्षितांपासून ते रिक्षा चालक, टेम्पो चालक अशा सर्वांचा समावेश आहे. महापालिकेचे कर्मचाऱ्यांना एखादी व्यक्ती रस्त्यावर थुंकताना आढळली तर त्या व्यक्तीला पाण्याची बाटली आणि फडके देऊन रस्ता साफ करण्यास सांगितले जाते. त्याच प्रमाणे त्यांच्याकडून शंभर रुपये दंडही वसुल केला जात आहे. अशा प्रकारे रस्ता साफ करावा लागण्याची वेळ आल्यानंतर संबंधित व्यक्तीला लाज वाटते. तो त्याची चुकही कबुल करतो आणि परत अशी चुक करणार नाही असे नमूद करीत आहे.''