संगीतकार इलयाराजा यांना यंदाचा पद्मपाणी पुरस्कार

छत्रपती संभाजीनगर, ता. १८ : अजिंठा-वेरूळ आंतरराष्ट्रीय चित्रपट महोत्सवानिमित्त दिला जाणारा प्रतिष्ठेचा पद्मपाणी पुरस्कार यंदा चित्रपट संगीताला नवी दिशा देणारे ज्येष्ठ संगीतकार इलयाराजा यांना जाहीर झाला आहे. येत्या २८ जानेवारीला छत्रपती संभाजीनगरात होणाऱ्या अजिंठा-वेरूळ आंतरराष्ट्रीय चित्रपट महोत्सवाच्या उद्‍घाटन सोहळ्यात हा पुरस्कार प्रदान करण्यात येणार आहे.
ज्येष्ठ समीक्षक लतिका पाडगावकर, चित्रपट दिग्दर्शक आशुतोष गोवारीकर, सुनील सुकथनकर व चंद्रकांत कुलकर्णी यांचा समावेश असलेल्या निवड समितीने इलयाराजा यांची निवड केली. यंदाचा अजिंठा-वेरूळ आंतरराष्ट्रीय चित्रपट महोत्सव २८ जानेवारी ते १ फेब्रुवारी या कालावधीत होत असून, २८ जानेवारी रोजी सायंकाळी साडेपाच वाजता चित्रपट महोत्सवाचे उद्‍घाटन होणार आहे.
फोटो ः 61998