पुणे - टिळक चौकात संभाजी पोलिस चौकीच्या मागे नदीपात्रातील नियमबाह्य होर्डिंग उच्च न्यायालयाच्या आदेशानुसार पाडून टाकण्यात आले होते. आता याठिकाणी पुन्हा एकदा महापालिकेची होर्डिंग उभारणीचे काम सुरु झाले आहे.
या कामासंदर्भात महापालिकेचे कर्मचारी चौकशीसाठी गेले असता त्यांना दादागिरी करून हुसकावून लावल्याचा व्हिडिओही व्हायरल झाला आहे. दरम्यान, याप्रकरणात अतिरिक्त आयुक्त पृथ्वीराज बी. पी. यांनी गुन्हा दाखल करण्याचे आदेश अधिकाऱ्यांना दिले आहेत.
राज्य शासनाच्या आकाशचिन्ह नियमावलीनुसार शासकीय जागेत, नदीपात्रात होर्डिंग उभारण्यास बंदी घालण्यात आली आहे. या नियमाचे उल्लंघन करून कसबा विश्रामबाग क्षेत्रीय कार्यालयाच्या हद्दीत संभाजी पोलिस चौकीच्या मागे होर्डिंग उभारण्यात आले होते.
याविरोधात तक्रारी आल्यानंतर तत्कालीन आयुक्तांनी चौकशी करण्याचे आदेश दिले. तर चुकीची परवानगी दिल्याने दोन कर्मचाऱ्यांना निलंबितही केले होते. तत्कालीन अतिरिक्त आयुक्तांनी जागा पाहणी करून याचा सविस्तर अहवाल आयुक्तांना सादर केला होता. याप्रकरणी न्यायालयातही याचिका दाखल झाली होती. त्यात महापालिकेच्या बाजूने निकाल लागला.
त्यानंतर फेब्रुवारी २०२३ मध्ये हे होर्डिंग पाडून टाकण्यात आले होते. यानंतर आता या ठिकाणी पुन्हा होर्डिंग उभारणी करण्याचे काम सुरु झाले आहे. होर्डिंग व्यावसायिकाकडून आम्हाला न्यायालयाने परवानगी दिली असल्याचे सांगितले, पण आदेश काय आहे ते सांगण्यास नकार दिला. होर्डिंग उभे करण्यासाठी नदीपात्रात साहित्य आणून ठेवले असून, तेथे होर्डिंग उभारणीचे काम सुरु झाले आहे.
आज (ता. २८) महापालिकेचे कर्मचारी याठिकाणी गेले असता, त्यांना काम थांबविण्याचे आदेश लेखी आदेश घेऊन यायचे आणि न्यायालयात दे. अभ्यास करून इथे यायचे असे बजावून त्यांना तेथून हुसकावून लावण्यात आले.
याबाबत कसबा विश्रामबाग क्षेत्रीय कार्यालयाचे सहाय्यक आयुक्त सुहास यादव म्हणाले, ‘यासंदर्भात न्यायालयात याचिका दाखल आहे. त्यासंदर्भातील कागदपत्र मागविण्यात आले आहेत.’
विधी सल्लागार ॲड. निशा चव्हाण म्हणाल्या,‘‘याठिकाणी होर्डिंग उभारण्याबाबत न्यायालयाने परवानगी दिली असल्याबाबत महापालिकेला कोणतीही माहिती नाही.
अतिरिक्त आयुक्त पृथ्वीराज बी. पी. म्हणाले. ‘होर्डिंगला परवानगी माझ्याकडून दिली जाते, मी अशा प्रकारे कोणत्याही होर्डिंगला परवानगी दिलेली नाही. काम थांबविण्यासाठी गेलेल्या महापालिकेच्या कर्मचाऱ्यांवर दादागिरी केल्याने तर संबंधितांवर गुन्हा दाखल करण्यास सांगितले आहे.’
महापालिका अंधारात
याठिकाणी काम सुरु झाले असले तरी न्यायालयीत प्रक्रियेबाबत महापालिकेचे अधिकारी अंधरात होते. न्यायालयीन प्रक्रियेबाबतही त्यांना माहिती नव्हते. आम्ही नवीन आलो आहोत, त्यामुळे आम्हाला जास्त माहिती नाही. आता माहिती घेत आहोत असे आकाशचिन्ह विभागाच्या अधिकाऱ्यांकडून सांगण्यात आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.