आयएनएस शिवाजीतर्फे ‘बोट पुलिंग रेगाटा’ उत्साहात

पुणे : आयएनएस शिवाजी लोणावळा येथील भारतीय नौदलाची सागरी अभियांत्रिकी संस्थेच्या वतीने ‘बोट पुलिंग रेगाटा’ या स्पर्धेचे आयोजन केले होते. नौदल सप्ताहांतर्गत आयोजित या स्पर्धेत नौदलाच्या प्रशिक्षणार्थी अधिकारी, जवान, सेवेत असलेले अधिकारी, जवान, कर्मचारी यांच्या एकूण नऊ संघांनी सहभाग घेतला होता. भारतीय नौदलात नौदल क्रीडामधील एक सर्वांत प्रतिष्ठेची आणि राष्ट्रीय स्तरावरची ही स्पर्धा आयएनएस शिवाजी येथील शिवसागर धरण येथे झाली. स्पर्धेमध्ये नौकानयन आणि त्यांचे विविध प्रकार घेण्यात आले. स्पर्धेत अधिकारी संघाने प्रथम क्रमांक मिळविला असून, आयएनएस शिवाजीचे प्रमुख कमोडोर अरविंद रावल यांच्या हस्ते ‘द कॉक’ हे पारितोषिक प्रदान केले.

हाफ मॅरेथॉन स्पर्धेस प्रतिसाद

शनिवारी आयएनएस शिवाजी येथे १० आणि ५ किलोमीटरचा हाफ मॅरेथॉनची स्पर्धा पार पडली. या स्पर्धेमध्ये ६०० स्पर्धकांनी सहभाग घेतला. यामध्ये तिन्ही दलांचे अधिकारी, जवान, त्यांचे कुटुंब, कर्मचारी आदींचा समावेश होता. स्पर्धेचा समारोप आयएनएस शिवाजीचे प्रमुख कमोडोर अरविंद रावल यांच्या हस्ते विजेत्यांना पदके आणि सहभागी झालेल्या स्पर्धकांना प्रमाणपत्र देऊन झाला.