पूल वाहून गेल्याने पुण्यातील नागरिकांना पाणी, गरजेच्या वस्तूं कशा आणाव्या लागतात एकदा पाहाच!

कुरकुंभ : मळद (ता. दौंड) येथील तलाव निकृष्ट दर्जामुळे फुटून ओढयाला पूर आल्याने कोल्हे-सय्यदवस्तीजवळील पूल वाहून गेला. त्यामुळे पंधरा दिवसांपासून पाण्यामुळे  दळणवळण ठप्प झाल्याने पिण्याचे पाणी, दैनंदिन गरजेच्या वस्तूंची गैरसोय होत आहे.

पुण्याच्या बातम्या वाचण्यासाठी येथे ► क्लिक करा

दौंड तालुक्यात 14 ऑक्टोबर 2020 रोजी जोरदार पाऊस झाल्याने मळद येथील निकृष्ट काम झालेला तलाव फुटला. त्यामुळे ओढयाला पूर आल्याने कोल्हे-सय्यदवस्तीजवळील पूल वाहून गेल्याने दळणवळण ठप्प झाले आहे.

ओढयात पाणी जास्त असल्याने वाहने जाणे बंद झाले आहे. त्यामुळे आजारी व्यक्तींना दवाखान्यात उपचारासाठी घेऊन जाणे अवघड बनलेले आहे. पिण्याचे पाणी, किराणा माल, दळण, शेतीमाल वाहतूक, खतं, औषधं, बियाणांची इत्यादी वस्तूची आणणे अवघड झाले आहे. अत्यंत आवश्यकता असल्यास तरूण ओढयावर दोन्ही बाजूला बांधलेल्या ठिबक नळयांचा आधार येऊन पाण्यातून जीवधोक्यात घालून येजा करीत आहेत.

19 ऑक्टोबर रोजी राज्याचे माजी मुख्यमंत्री तथा विधानसभा विरोधी पक्षनेते देवेंद्र फडणवीस,  विधानपरिषद विरोधी पक्षनेते प्रवीण दरेकर आमदार राहुल कुल यांनी सदर ठिकाणी भेट देऊन ओढयाच्या दुसर्‍या बाजूला उभ्या असणाऱ्या महिला, ग्रामस्थांशी संवाद साधून व्यथा जाणून घेतल्या होत्या.

ताज्या बातम्यांसाठी डाऊनलोड करा ई-सकाळचे ऍप

यावेळी ग्रामस्थांनी वाहून गेलेल्या पुलाचे काम त्वरित करण्याची मागणी केली होती. पूल वाहून गेलेल्या घटनेला पंधरा दिवस झाले तरीही शासनाकडून कोणत्याही उपाययोजना करण्यात आल्या नाहीत. सध्या पिण्याचे शुद्ध पाणी व जीवनावश्यक वस्तू आणण्यासाठी अडचणी येत असल्याने ग्रामस्थ,  महिला त्रस्त आहेत. त्यामुळे कोल्हे - सय्यदवस्तीवरील ग्रामस्थांकडून पुलासाठी तातडीने निधी उपलब्ध करून देण्याची मागणी होत आहे.

(संपादन : सागर डी. शेलार)