लोहगावातील 'त्या' दुकानाची तपासणी करण्यात आली कारण....

विश्रांतवाडी (पुणे) : लोहगाव येथील स्वामी समर्थ महिला बचत गटांतर्गत चालविणाऱ्या जाणाऱ्या स्वस्त धान्य दुकानाबाबत नागरिकांच्या तक्रारी आल्यानंतर भरारी पथकाने दुकानाची तपासणी केली. तपासणीवेळी दुकानात धान्य कमी आढळून आले आहे. याशिवाय दुकानाविषयी नागरिकांचेदेखील जबाब नोंदवून घेण्यात आले. या कारवाईमुळे रेशनच्या धान्यवाटपात होणा-या  गैरप्रकारांना आळा बसेल, अशी आशा आहे. लोहगावातील मोझे आळीत स्वामी समर्थ महिला बचत गट अंतर्गत स्वस्त धान्य दुकान आहे. या स्वस्त धान्य दुकानाविषयी लोहगावमधील नागरिकांच्या अनेक तक्रारी होत्या. वेळेवर दुकान उघडत नाही. धान्य कमी दिले जाते. मोफत मिळणारा तांदूळ दिला जात नाही.

पुण्याच्या बातम्या वाचण्यासाठी येथे  क्लिक करा

अन्नसुरक्षा योजने अंतर्गत लाभार्थ्यांना मिळणारी डाळ वाटप केली जात नाही. नागरिकांना उद्धट वागणूक मिळतात अशा अनेक तक्रारी प्राप्त झाल्या होत्या. सुनील खांदवे, संदीप मोझे, सोमनाथ खांदवे, संतोष खांदवे, बंटी जंगम, रावसाहेब राखपसरे यांनी स्वस्त धान्य दुकानांच्या तक्रारीबाबत समिती गठित करून रेशनधारकांच्या तक्रारी प्राप्त करून घेतल्या होत्या. तक्रारी आल्यानंतर पुरवठा निरीक्षक रविकिरण शेटे, नगररचना विभागाचे अधिकारी घोडके यांच्या भरारी पथकाने स्वस्त धान्य दुकानाची अचानक तपासणी केली. या तपासणीत धान्य कमी आढळून आले. याशिवाय सर्वसामान्य नागरिकांचे दुकानाविषयी जबाब नोंदवून घेतले.

यावेळी नागरिकांनीदेखील भरारी पथकाला तक्रारी सांगितल्या आहेत. भरारी पथक सर्व अहवाल तयार करून एफडीओकडे कारवाईसाठी ठेवणार असल्याची माहिती ई परिमंडळ विभागाचे अधिकारी प्रशांत खताळ यांनी दिली. आता या दुकानावर काय कारवाई होणार याकडे लोहगावकारांचे लक्ष लागले आहे.