Deenanath Hospital : ईश्वरी भिसेंचा मृत्यू कशामुळे झाला? अहवालातून समोर आली माहिती

पुणे - ईश्वरी भिसे यांना वेळेत उपचार न मिळाल्याने त्यांचा मृत्यू झाला. हा मातामृत्‍यू असून त्‍याबाबत महापालिकेच्‍या मातामृत्यू अन्वेषण समितीने भिसे यांच्‍या मृत्‍यूचे विश्‍लेषण करून त्‍याचा अहवाल राज्‍य शासनाला शुक्रवारी सादर केला आहे.

तिच्‍या मेंदूला ऑक्सिजनचा पुरेसा पुरवठा न झाल्‍याने मेंदूच्या पेशींवर परिणाम होऊन मेंदूचे कार्य बिघडल्‍याने (हायपॉक्सिक एन्सेफॅलोपॅथी) तिचा मृत्यू झाल्याचा निष्कर्ष नोंदवण्यात आला आहे. दरम्‍यान, या प्रकरणात आतापर्यंत तीनही अहवाल शासनाला सादर झाले असून आता पुढील कारवाई काय केली जाते याकडे सर्वांचे लक्ष लागले आहे.

ईश्‍वरी भिसे यांचा मृत्यू आणि दीनानाथ रुग्णालयाचा हलगर्जीपणा याबाबत चौकशी करण्यासाठी आरोग्‍य विभाग, धर्मादाय विभाग व महापालिकेचा माता मृत्यू समिती या तीन समित्यांचे अहवाल महत्त्वाचे आहेत. सार्वजनिक आरोग्य विभाग व धर्मादाय सहआयुक्त समितीचा अहवाल याआधीच शासनाकडे सुपूर्त करण्यात आले आहेत.

आता, मातामृत्यू अन्वेषण समितीचा अहवालही सादर झाला आहे. ही समिती मातेचा मृत्‍यूचे कारण शोधण्‍याचा प्रयत्‍न करते. ही समिती तथ्य शोधणारी समिती आहे, दोष शोधणारी किंवा कोणावर मृत्‍यूची जबाबदारी निश्चित करण्‍याची नाही, अशी माहिती महापालिकेच्‍या आरोग्‍य विभागाकडून देण्‍यात आली. मातृमृत्यू अन्वेषण समिती महिलेचे वय, वैद्यकीय पार्श्वभूमी, वैवाहिक पार्श्वभूमी अशा विविध मुद्द्यांचा अभ्यास करते.

‘हायपॉक्सिक एन्सेफॅलोपॅथी’ बरोबरच ‘डिसेमिनेटेड इंट्राव्हॅस्क्युलर कोअ‍ॅग्युलेशन’ (डीआयसी) या स्थितीमुळे महिलेचा मृत्यू झाल्याचे अहवालात नमूद करण्यात आले आहे. ‘डीआयसी’ध्ये शरीरातील रक्ताच्या गाठी तयार होण्याची प्रक्रिया अनियमित व अति प्रमाणात सक्रिय होते. त्यामुळे शरीरात अनेक ठिकाणी लहान रक्तवाहिन्यांमध्ये गाठी तयार होतात.

रक्तवाहिन्यांमधील गाठींमुळे रक्तप्रवाह अडतो, त्यामुळे शरीराला पुरेसा ऑक्सिजन मिळत नाही. यामध्ये तातडीने उपचार न मिळाल्यास मातेचा जीव धोक्यात येऊ शकतो, असे आरोग्‍य विभागातील एका अधिका–याने सांगितले. हा अहवाल ऑनलाइन पोर्टलमधून शासनाकडे पाठवण्यात आला आहे, असेही त्‍यांनी सांगितले.