JEE : जेईई ॲडव्हान्स परीक्षेचा निकाल जाहीर

Pune - देशभरातील भारतीय तंत्रज्ञान संस्थेतील (आयआयटी) प्रवेशासाठी घेण्यात आलेल्या ‘जेईई ॲडव्हान्स’ परीक्षेचा निकाल आयआयटी गुवाहाटी यांच्या वतीने रविवारी जाहीर करण्यात आला. देशभरातील ४३ हजार ७७३ विद्यार्थी या परीक्षेत पात्र ठरले आहेत. आयआयटी हैदराबाद झोनमधील व्ही. सी. रेड्डी हा ३६० पैकी ३४१ गुण मिळवीत पहिला आला आहे. तर एन. एन. भाव्या श्री ही ३६० पैकी २९८ गुण मिळवीत मुलींमध्ये पहिली आहे.

जेईई ॲडव्हान्स परीक्षेसाठी एक लाख ८९ हजार ७४४ विद्यार्थ्यांनी नोंदणी केली होती. त्यातील सुमारे एक लाख ८० हजार ३७२ विद्यार्थ्यांनी जेईई ॲडव्हान्समधील पेपर एक आणि दोन या परीक्षा दिल्या आहेत. त्यातील ४३ हजार ७७३ विद्यार्थी पात्र ठरले आहेत. एकूण पात्र ठरलेल्या विद्यार्थ्यांमध्ये सात हजार ५०९ विद्यार्थिनी आहेत.

व्ही.सी रेड्डी यांच्यासह आयआयटी मुंबई झोनमधील दिपेन सोजित्रा, प्रियांशु कुमार (आयआयटी गुवाहाटी), आशिष कुमार (आयआयटी हैदराबाद), शंकित कुमार दास (आयआयटी खरगपूर), यांसह दहा विद्यार्थ्यांना पहिली रॅंक मिळाली आहे, अशी माहिती ‘आयआयटी गुवाहाटी’ यांच्यातर्फे देण्यात आली आहे.

जेईई ॲडव्हान्स परीक्षेतील आकडेवारी :

तपशील : नोंदणी केलेले : दोन्ही पेपर दिलेले : पात्र ठरलेले

विद्यार्थी : १,४६,१११ : १,३९,७२७ : ३६,२६४

विद्यार्थिनी : ४३,६३३ : ४०,६४५ : ७,५०९

जेईई ॲडव्हान्स परीक्षेतील विद्यार्थ्यांची संख्या :

तपशील : नोंदणी केलेले : दोन्ही पेपर दिलेले : पात्र ठरलेले

भारतीय विद्यार्थी : १,८८,८३३ : १,७९,६२६ : ४३,६०५

परदेशी विद्यार्थी : १२५ : १०८ : १३

ओसीआय विद्यार्थी : ७८६ : ६३८ : १५५