मुंढव्यात पाणीगळती दुरूस्त करून रस्त्यावर खड्डा तसाच

मुंढवा : मुंढवा-केशवनगर या मुख्य रस्त्यावरील बधेवस्ती समोर भर रस्त्यात वारंवार २४ वेळा पाणीपुरवठ्याचा पाईप फुटून होणाऱ्या पाणीगळतीसाठी रस्ता खोदाई करून त्याची दुरूस्ती केली गेली. पण प्रत्येक वेळी रस्त्यावरील डांबर उखडून खड्डा पडत असे. वारंवार दुरुस्ती करूनही रस्ता खराब होत असल्याने पंचवीसव्या वेळी पालिकेने खड्डा बुजविण्यासाठी डंबराऐवजी सिमेंटचा वापर करून खड्डा बुजविला. त्याच्या दोन्ही बाजूला बॅरिकेड उभे केले. पाच दिवसांनी बॅरिकेड काढून रस्ता वाहतुकीसाठी खुला केला. परंतु काही तासातच रस्त्यावर टाकलेले सिमेंट उखडले. त्यामुळे पालिकेने केलेल्या निष्कृष्ठ कामबद्दल नागरिक शंका घेत आहेत.

या ठिकाणी वारंवार रस्ता दुरुस्ती करूनही मुरूम, वाळू, माती वाहतूक करणाऱ्या अवजड वाहनांमुळे पाईप फुटतो व गळती होते. त्यामुळे रस्त्याची वाट लागते. या ठिकाणी सतत दुरुस्ती करूनही रस्ता खराब होत असल्याने प्रत्येक वेळी दुरुस्तीसाठी लागणारा पैसा, वेळ, नागरिकांचा खोळंबा होत आहे. पालिकेने येथे कायमस्वरूपी दुरूस्ती करावी अशी मागणी होत आहे.