Katraj News : कात्रज ते नवले पूल बाह्यवळण रस्त्याला पुन्हा मुदतवाढ; रुंदीकरणाचे काम संथ गतीने सुरू

कात्रज - कात्रज ते नवले पूल बाह्यवळण रस्त्याला पुन्हा मुदतवाढ देण्यात आली आहे. २०१९ मध्ये सुरू झालेले हे काम पूर्ण होण्यासाठी वर्षभराचा कालावधी लागणार असून कोरोना, लॉकडाऊन, महापालिकेच्या असहकार्याची करणे या विलंबासाठी महामार्ग प्राधिकरणाच्या अधिकाऱ्यांकडून देण्यात आल्यानंतर फेब्रुवारी २०२४ ची मुदतवाढ मिळाली होती.

हे काम फेब्रुवारी २०२४ मध्ये पूर्ण होणे अपेक्षित होते. मात्र, त्यांनंतर डिसेंबर २०२४ आणि आता ही मुदतवाढ पुन्हा डिसेंबर २०२५ पर्यंत देण्यात आली आहे. त्यामुळे सहा वर्षे उलटली तरी रस्त्याचे काम पूर्ण होत नाही आणि मुदतवाढ मिळूनही रुंदीकरणाचे काम संथ गतीनेच सुरू असल्याने नागरिकांतून संताप व्यक्त करण्यात येत आहे.

सद्यस्थितीत हे काम कासवगतीने सुरू आहे. यामुळे ते डिसेंबर २०२५ मध्ये तरी पूर्ण होणार का? हा प्रश्न अनुत्तरित आहे. या कामाला गती मिळाली नसली तरी वेळोवेळी मुदवाढ देऊनही काम पूर्ण होत नसल्याने नागरिकांनी बांधकाम खात्याच्या कामावर नाराजी व्यक्त केली आहे. चार किमी लांबीचा हा भाग मोठ्या संख्येने निवासी गृहनिर्माण सोसायट्या, छोटी मोठी दुकाने आणि कारखान्यांनी वेढलेला आहे, त्यामुळे येथे २४ तास प्रवाशांची तसेच अवजड वाहनांची वर्दळ असते.

महामार्गाच्या दोन्ही बाजूचे डोंगराळ खडक तोडणे, अतिक्रमणे हटविणे, सेवा रस्ते बांधणे, विविध पाइपलाइन टाकणे यासह अन्य कामे बहुतांशी ठिकाणी पूर्णत्वास असली तरी त्याला वेग नाही. यामुळे या परिसरातील वाहतूक कोंडीचा प्रश्न कायम आहे. विकास आराखड्यानुसार सदर रस्त्याचे काम वेळेत पूर्ण व्हावे, अशी मागणी आता जोर धरू लागली आहे.

प्रतिक्रिया

या कामास डिसेंबर २०२५ अखेरपर्यंत मुदतवाढ मिळाली असून सदर रस्त्याचे काम पूर्ण करण्यासाठी डिसेंबर अखेरपर्यंत नियोजन करण्यात आले आहे. आवश्यक जागा महापालिकेकडून ताब्यात मिळाली नाही. महापालिकेशी समन्वय साधण्यात आला असून, सदर जागा लवकर ताब्यात मिळेल व काम पूर्ण होईल.

- अतुल सुर्वे, शाखा अभियंता, राष्ट्रीय महामार्ग

संबंधित रस्त्याचे काम जवळपास पूर्ण झाल्यासारखे आहे. केवळ किरकोळ कामांसाठी प्रशासन आता वेळकाढूपणा का करत आहे हे कळत नाही. प्रशासनाने करणे न देता राहिलेली किरकोळ कामे लवकरात लवकर काम पूर्ण करावीत.

- अभिजीत सोनवणे, स्थानिक नागरिक