सोमय्या दोन तास पोलीस ठाण्यात बसले, शेवटी गुन्हा दाखल नाहीच

किरीट सोमय्या जंबो कोविड रुग्णालयाचा घोटाळा काढण्यासाठी पुणे महानगपालिकेत गेल्यानंतर त्यांना आक्रमक शिवसैनिकांनी धक्काबुक्की केली. यामध्ये सोमय्यांचा पाय घसरला आणि त्यांच्या हाताला दुखापत झाली. (Kirit Somaiya in PMC)

हे प्रकरण झाल्यानंतर राज्यात पुन्हा शिवसैनिक आणि भाजपाचे कार्यकर्ते एकमेकांना भिडले. यानंतर सोमय्यांना दुखापत झालेल्या पायऱ्यांवरच त्यांचा भाजपच्या वतीने सत्कार करण्यात आला. यानंतर सोमय्यांना पोलीस ठाण्यात बोलावण्यात आलं होतं. यावेळी त्यांच्यासोबत भाजपचे खासदार गिरीष बापट आणि शहराध्यक्ष जगदीश मुळीक उपस्थित होते.

सोमय्यांना धक्काबुक्की झाल्यानंतर पुणे पोलिसांनी आतापर्यंत ९ जणांना अटक केली आहे. या दरम्यान सोमय्यांनी पोलीस ठाण्यात तक्रार दाखल करण्याचा प्रयत्न केला. आपल्या तक्रारीनुसारच शिवसैनिकांवर गुन्हा दाखल करण्यासाठी सोमय्या इच्छूक होते. त्यासाठी रात्रीपर्यंत शिवाजीनगर पोलीस ठाण्यात ते बसले.

मात्र, दोन तास बसल्यानंतरही त्यांचा गुन्हा नोंदवून घेण्यात आला नाही. त्याऐवजी पोलिसांनी सुरुवातीला दाखल झालेल्या गुन्ह्यात सोमय्यांचा जबाब नोंदवला आणि प्रकरणार पडदा पडला.

हे झाल्यानंतर पोलीस आयुक्त अमिताभ गुप्ता मुख्यमंत्र्यांच्या दबावाखाली काम करत असल्याचा आरोप सोम्य्यांनी केला आहे. त्यामुळे पुण्याच्या पोलीस आयुक्तांनी राजीनामा द्यावी अशी मागणी त्यांनी केली.