Open Gym : ओपन जीममध्ये वीजेच्या धक्क्याने युवकाचा मृत्यु

कोथरूड - अमोल शंकर नाकते (वय-22) रा. भूगाव या युवकाचा उजव्या भुसारी कॉलनीतील ओपन जीमवर व्यायाम करताना मृत्यु झाला. संध्याकाळी आठच्या सुमारास ही घटना घडली. त्याच्यामागे आई व भाऊ असा परिवार आहे.

अमोल हा इव्हेंट मॅनेजमेंट ची कामे करायचा. तो रोज संयुक्त भुसारी कॉलनी मित्र मंडळाच्या मैदानात मित्रांसोबत यायचा. आजही तो व्यायाम करता करता फोनवर बोलत होता. अचानक तो खाली पडल्याचे पाहून मित्रांनी त्याच्याकडे धाव घेतली. त्याला जवळच्या इस्पितळात दाखल केले. त्याच्या पायातून विजेचा प्रवाह वाहिल्याने पायाची बोटे काळेनीळे झाले होते. डॉक्टरांनी तो मृत असल्याचे घोषित केले.

हेल्प रायडर प्रशांत कनोजिया म्हणाले की, ओपन जीमच्या या खेळण्याखालून वीजेच्या वाहिन्या जात आहेत. त्याची योग्य तपासणी करावी.

अग्निशमन दलाचे गजानन पाथ्रुडकर म्हणाले की, खुल्या मैदानात जॉगिंग ट्रॅक व ओपन जीम आहे. येथे वीजेचा धक्का बसून युवकाचा मृत्यु झाला. हा वीज प्रवाह कोणता याची अधिक तपासणी करणे गरजेचे आहे. कोथरूड पोलीस ठाण्याचे वरिष्ठ पोलीस निरीक्षक हेमंत पाटील म्हणाले की, तपास सुरू आहे. पोस्ट मार्टम रिपोर्ट आल्यावर यावर अधिक सांगता येईल.