कला व वाणिज्य महाविद्यालयाकडून श्रमसंस्कार शिबिराचे आयोजन

वेटणेत ‘कला, वाणिज्य’मार्फत
आजपासून श्रमसंस्कार शिबिर

पुसेगाव, ता. ५ : रयत शिक्षण संस्थेच्या येथील कला व वाणिज्य महाविद्यालयाच्या राष्ट्रीय सेवा योजना (एनएसएस) विभागांतर्गत सात दिवसीय निवासी श्रमसंस्कार शिबिराचे आयोजन वेटणे (ता. खटाव) येथे उद्या (मंगळवार) ते सोमवार (ता. १२) या कालावधीत करण्यात आले आहे.
शिबिराचा मुख्य उद्देश म्हणजे शाश्वत विकासासाठी तरुणाईचा सक्रिय सहभाग वाढविणे होय. त्याअंतर्गत जलसंधारण व पडीक जमिनीचे पुनर्वसन, आरोग्य दक्षता, ग्रामस्वच्छता, तसेच पर्यावरण संवर्धन यांसारख्या महत्त्वाच्या विषयांवर विविध उपक्रम राबविण्यात येणार आहेत. महाविद्यालयाचे प्रभारी प्राचार्य डॉ. आर. पी. भोसले आणि रयत शिक्षण संस्थेचे आजीव सभासद प्रा. डॉ. संजय क्षीरसागर यांच्या मार्गदर्शनाखाली या सात दिवसीय शिबिरात तज्ज्ञ मार्गदर्शकांची व्याख्याने, चर्चासत्रे, कार्यशाळा, तसेच प्रत्यक्ष श्रमदानाचे उपक्रम आयोजित करण्यात आले आहेत. या श्रमसंस्कार शिबिराचे नियोजन प्रा. डॉ. किरण कुंभार, प्रा. डॉ. हनुमंत निमसे यांनी केले आहे. या शिबिराच्या यशस्वी आयोजनासाठी वेटणे ग्रामपंचायत, सरपंच व ग्रामस्थांचे मोलाचे सहकार्य लाभले आहे.

----------------------------