बिबट्याच्या हल्ल्यातील मृतांच्या वारसांना
आर्थिक मदत मिळवून देणार : डॉ. बच्छाव
सकाळ वृत्तसेवा
सटाणा, ता.२३ : ठेंगोडा (ता. बागलाण) येथे दोन दिवसांपूर्वी झालेल्या बिबट्याच्या हल्ल्यांत दोन महिलांचा मृत्यू झाला. या दुर्घटनांमुळे दोन कुटुंबांचा आधार हरपला असून, त्यांच्या वारसांना आर्थिक दिलासा मिळावा, यासाठी केंद्र शासनाच्या माध्यमातून प्रत्येकी २५ लाख रुपयांची मदत मिळवून देण्यासाठी प्रयत्न करणार असल्याची ग्वाही खासदार डॉ. शोभा बच्छाव यांनी दिली.
या दुर्घटनेनंतर खासदार शोभा बच्छाव यांनी वनविभागाचे अधिकारी व प्रशासनाचे काही घटकांची त्यांच्या येथील संपर्क कार्यालयात बैठक आयोजित केली होती. त्यावेळी त्या बोलत होत्या. बिबट्यांच्या वाढत्या संचारामुळे नागरिकांच्या जीविताला निर्माण झालेला धोका लक्षात घेता, भविष्यात अशा घटनांची पुनरावृत्ती टाळण्यासाठी केंद्र सरकारकडे ठोस उपाययोजना राबविण्यासाठी मागणी करणार असल्याचेही आश्‍वासन त्यांनी यावेळी दिले.
आठवडाभरापासून बागलाण तालुक्यात विविध ठिकाणी बिबट्यांचा वावर वाढल्याने शेतकरी, शेतमजूर आणि ग्रामस्थांमध्ये चिंतेचे वातावरण आहे. या परिस्थितीची वनविभागाने दखल घेऊन योग्य त्या उपाययोजना कराव्यात. अशा सूचना त्यांनी यावेळी वनपरिक्षेत्राधिकारी सोमनाथ आमले यांच्यासह वन विभागाच्या अधिकाऱ्यांना दिल्या. बैठकीत बिबट्यांच्या हालचाली, त्यांच्या वावराची ठिकाणे, संभाव्य धोके आणि वन विभागाकडून सुरू असलेल्या उपाययोजनांचा त्यांनी आढावा घेतला. नागरिकांच्या सुरक्षिततेला सर्वोच्च प्राधान्य देऊन बिबट्यांचा वावर असलेल्या भागात सतर्कता वाढविणे आणि संभाव्य हल्ले रोखण्यासाठी संबंधित यंत्रणांनी समन्वयाने काम करणे आवश्यक असल्याचे त्यांनी सूचित केले.
---------
वीजपुरवठा सुरळीत ठेवा
ठेंगोडा परिसरात रात्रीच्या वेळी नागरिकांच्या सुरक्षिततेच्या दृष्टीने वीजपुरवठा खंडित करू नये, अशा सूचनाही डॉ. बच्छाव यांनी वीज वितरण कंपनीच्या अधिकाऱ्यांना दिल्या. रात्रीच्या वेळी सिंगल फेज वीजपुरवठा सुरू राहील, यासाठी योग्य नियोजन करण्याचे निर्देशही त्यांनी दिले. बिबट्यांच्या वाढत्या वावरामुळे ग्रामस्थांच्या दैनंदिन जीवनावर परिणाम होत असून, नागरिकांमधील भीती दूर करण्यासाठी केवळ आश्वासनांपुरते न थांबता प्रतिबंधात्मक उपाययोजनांची प्रभावी अंमलबजावणी करा असेही त्यांनी सांगितले.
