लोणावळा नगर परिषद शाळेचे स्नेहसंमेलन उत्साहात

लोणावळा, ता. ५ : नगर परिषदेच्या माध्यमिक विद्यालयाचे वार्षिक स्नेहसंमेलन उत्साहात पार पडले. याचे उद्घाटन रोटरी क्लब ऑफ लोणावळाच्या अध्यक्षा विजया कल्याण व शाळा समितीचे माजी सभापती तथा नगरसेवक देविदास कडू यांच्या हस्ते करण्यात आले.
रांगोळी व चित्रकला प्रदर्शनाचे उद्घाटन नगरसेवक दत्तात्रेय येवले यांच्या हस्ते झाले. बक्षीस वितरण व विविध गुणदर्शन कार्यक्रमांचे उद्घाटन नगराध्यक्ष राजेंद्र सोनवणे यांच्या हस्ते झाले.
यंदाच्या स्नेहसंमेलनाची संकल्पना ‘स्वच्छ भारत अभियान’, ‘स्त्रीमुक्ती व राष्ट्रभक्ती’ या विषयांवर आधारित होती. विद्यार्थ्यांनी लोकनृत्य, गायन व अभिनयाच्या माध्यमातून विविध सामाजिक संदेश सादर केले. शाळेच्या माजी विद्यार्थिनी व गायिका वर्षा देसाई-फाले यांच्या गायनाने उपस्थित मंत्रमुग्ध झाले.
प्रास्ताविक शाळेचे मुख्याध्यापक बाळकृष्ण बलकवडे यांनी केले. सूत्रसंचालन रामचंद्र सूर्यवंशी व पालक सदस्य गणेश देसाई यांनी केले. अमजद पठाण यांनी आभार मानले. श्रद्धा मंगवडे, साक्षी नलवडे, राजू काजळे यांनी संयोजन केले. यावेळी नवनियुक्त नगरसेवकांसह आजी, माजी पदाधिकारी आणि नागरिक उपस्थित होते.