लोणावळा : बोर घाटात तीन वाहनांचा अपघाता; दोन ठार दोन जखमी

लोणावळा : पुणे मुंबई द्रुतगती मार्गावर अपघातांची मालिका सुरूच आहे.  शनिवारी (ता.१९) द्रुतगती मार्गावर फुडमॉल जवळ (किलोमीटर क्रमांक ३६ ) दुपारी दोन कंटेनर व मोटारीच्या विचित्र अपघातात दोन जणांचा जागीच मृत्यू झाला तर दोन जण गंभीर जखमी झाले. अपघातातील मृतांची नावे समजू शकली नाहीत. तर अनिता सिंग (वय-५४), अखिलेश सिंग (वय-५५, रा.पुणे) अशी जखमींची नावे आहेत. (Pune Mumbai Road Accident News)

महामार्ग पोलिसांनी दिलेल्या माहितीनुसार, पुण्याहून मुंबईच्या दिशेने जाणाऱ्या भरधाव कंटेनर चे पानावरील चालकाचे वाहनावरील नियंत्रण सुटल्याने कंटेनरने पुढे जाणाऱ्या अन्य एका कंटेनर व कारला जोरात धडक दिली या घटनेत कंटेनर मार्गावरील लगत खड्ड्यात जाऊन आडवा झाला. यामध्ये कंटेनर चालक व क्लीनरचा जागीच मृत्यू झाला. तर मोटारीतील अनिता सिंग व अखिलेश सिंग हे जखमी झाले अनिता सिंग यांची प्रकृती गंभीर आहे.

त्यांच्यावर कामोठे येथील एमजीएम रुग्णालयात उपचार सुरु आहे. आयआरबी पेट्रोलिंग, देवदूत यंत्रणा, महामार्ग वाहतूक पोलीस, खोपोली पोलिस, डेल्टा फोर्स, लोकमान्य आरोग्य सेवा मदत पथक घटनास्थळी दाखल होत मदतकार्य सुरू करण्यात आले. अपघानंतर द्रुतगती मार्गावरील वाहतूक काही काळ विस्कळीत झाली होती.

द्रुतगती वरील अपघातांची मालिका सुरूच

द्रुतगती वरील अपघातांची मालिका सुरूच आहे. मंगळवारी (ता.१५) रोजी खोपोली एक्झिट जवळ सहा वाहनांचा अपघात झाला होता. या अपघातात सोलापूरातील काँग्रेसच्या जिल्हा उपाध्यक्षासह त्यांच्या तीन मित्रांचा दुर्दैवी मृत्यू झाला होता.