नसरापूर - ‘तीस हजार रुपये प्रति तोळ्याने सोनं देतो,’ असे आमिष दाखवत साडेदहा लाख रुपयांची फसवणूक झाल्याचा प्रकार सोमवारी (ता. ४) कापूरव्होळ येथे घडला..याबाबत जयकुमार बाबासाहेब नरदेकर (वय ४७, रा. कुपवाड, ता. मिरज, जि. सांगली) यांनी राजगड पोलीस ठाण्यात तक्रार दिली. घटनास्थळी फिर्यादी व त्यांच्या मित्रांनी पकडलेल्या कृष्णा प्रकाश तुपे (रा. वडजल, ता. माण, जि. सातारा), राहुल चव्हाण (रा. वराडे, ता. कराड, जि. सातारा), या दोघांना पोलिसांनी ताब्यात घेतले आहे. मात्र, बुवा ठाकूर (पूर्ण नाव व पत्ता माहीती नाही) व एक अनोळखी साथीदार हे दोघे पैसे घेऊन पळुन जाण्यात यशस्वी झाले. या चौघांविरोधात गुन्हा दाखल केला आहे..फिर्यादी नरदेकर हे मिरज येथील एका खासगी कंपनीत नोकरीस असून, तिथेच त्यांची ओळख आरोपी कृष्णा तुपे याच्याशी झाली. काही दिवसांनी तुपे याने, ‘माझ्या जबाबदारीवर तुला स्वस्तात सोनं मिळवून देतो,’ असे सांगत १६ जुलै रोजी मध्य प्रदेशातील कटणी येथे नेले. तेथे बुवा ठाकूर नावाच्या व्यक्तीने ३० हजार रुपये प्रति तोळा दराने सोनं विकत असल्याचे सांगितले.त्या वेळी फिर्यादींना एक ग्रॅम सॅम्पल सोनं देण्यात आले, जे फिर्यादींनी तपासणी केल्यावर खरे असल्याचे निष्पन्न झाले. त्यामुळे फिर्यादींचा विश्वास बसला. त्यानंतर तुपे याने सतत फोन करून सोनं घेण्याबाबत तगादा लावला. ‘मी जबाबदार आहे,’ अशी खात्री तो देत होता. अखेर २ ऑगस्ट रोजी फिर्यादींनी १० लाख ५० हजार रुपयांचे सोनं घेण्याचा निर्णय घेतला..त्यांनी सांगली येथे डिलिव्हरी देण्याची मागणी केली. मात्र, बुवा ठाकूर याने सांगली लांब असल्याचे सांगून, ‘पुण्यात या, मीही तिकडे येतो,’ असे सांगितले. त्यावेळी फिर्यादींनी नकार दिला, पण तुपे याने फिर्यादींना विश्वास देत, ‘काही धोका नाही, मी जबाबदार आहे,’ असे सांगुन पुण्यात भेटण्यास तयार केले.त्यानुसार ४ ऑगस्ट रोजी ठाकूर याने पुण्यात सोनं देणार असल्याचे सांगितले. त्यामुळे फिर्यादी हे त्यांच्या शिवानंद ज्ञामगौडर आणि दीपक वनसुरे या मित्रांसह १० लाख ५० हजार रुपये घेऊन पुण्याकडे रवाना झाले. शिरवळजवळ आल्यावर कृष्णा तुपे याने फोन करून त्यांना कापूरव्होळ उड्डाणपुलाखाली बोलावले..तिथे फिर्यादींची तुपे व राहुल चव्हाण याच्याशी भेट झाली. त्यानंतर तुपे याने ठाकूरला फोन केला असता त्याने भोरच्या दिशेने येण्यास सांगितले. कापूरव्होळ- भोर रस्त्याने पुढे ३ किलोमीटर आल्यावर त्यांना ठाकूर उभा दिसला. तिथे ठाकूर याने फिर्यादींना पैसे दाखवण्यास सांगितले.त्यानंतर पैसे घेत, ‘तुम्हाला सोने आणून देतो, तुम्ही इथेच थांबा,’ असे सांगत शेतात जाणाऱ्या रस्त्याने आत गेला, पण पुन्हा परतलाच नाही. फिर्यादीने तुपे याला विचारले, ‘बुवा कुठे गेला? अद्यापपर्यंत कसा आला नाही.’ परंतु, तुपे याने उडवा डवीची उत्तरे दिली..संशय आल्याने फिर्यादी व मित्रांनी शेतात शोधाशोध केली, पण कोणीही आढळून आले नाही. फसवणूक झाल्याचे लक्षात येताच फिर्यादींनी तुपे याला पोलिस ठाण्याकडे येण्यास सांगितले. तेव्हा तुपे याने त्यांना, ‘पोलिसांत गेला तर त्रास होईल,’ अशी धमकी दिली.परंतु, फिर्यादी व त्यांच्या मित्रांनी प्रसंगावधान राखत तुपे आणि चव्हाण याला पकडुन राजगड पोलिसांच्या स्वाधीन केले. दोघांना न्यायालयात हजर केले असता शुक्रवारपर्यंत (ता. ८) पोलिस कोठडी सुनावण्यात आली. या प्रकरणाचा पुढील तपास पोलीस हवालदार नाना मदने करत आहेत..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
