श्री क्षेत्र महाबळेश्वर येथे १८ जानेवारीला राजमाता जिजाऊ ‘सुवर्णतुला दिन’ महोत्सव; मान्यवरांची उपस्थिती लाभणार

महाबळेश्वरमध्ये उद्या
सुवर्णतुला दिन महोत्सव

महाबळेश्वर, ता. १६ ः राजमाता जिजाऊ यांच्या मातृभक्तीचा, संस्कारांचा आणि छत्रपती शिवाजी महाराजांच्या जाज्वल्य इतिहासाचा साक्षीदार असलेला ऐतिहासिक ‘सुवर्णतुला’ प्रसंग यंदा ३६१ वर्षांचा होत असून, त्यानिमित्त रविवारी (ता. १८) श्री क्षेत्र महाबळेश्वर येथे ‘३६१ वा सुवर्णतुला दिन महोत्सव’ साजरा केला जाणार आहे. या महोत्सवाचे आयोजन श्री क्षेत्र महाबळेश्वर येथील ग्रामस्थ मंडळाच्या वतीने करण्यात आले आहे.
यावेळी विविध धार्मिक व सांस्कृतिक कार्यक्रमांचे आयोजन करण्यात आले आहे. सायंकाळी प्रतिकृती तुला पूजन, अभिषेक पूजा व दीपप्रज्वलन होणार आहे. त्यानंतर ‘लोकप्रबोधन’ हा सांस्कृतिक कार्यक्रम, राजमाता जिजाऊ सन्मान सोहळा होणार असून, यावेळी आंतरराष्ट्रीय तिरंदाज खेळाडू आदिती गोपीचंद स्वामी हिचा विशेष गौरव करण्यात येणार आहे. त्यानंतर किल्ले स्पर्धेचे पारितोषिक वितरण होईल. रात्री नऊ वाजल्यापासून ‘पुन्हा फोक प्रबोधन’ आयोजन करण्यात आले आहे.

---------------------