मानाचे आणि मंडळांच्या गणरायांचेही यंदा मंडपातच विसर्जन 

पुणे - पुण्यातील गणेशोत्सवाचा समारोप म्हणजे विसर्जन मिरवणूक. लाखो भाविकांचे आकर्षण असलेली ही मिरवणूक यंदा कोरोनामुळे काढली जाणार नाही. मानाचे आणि प्रमुख गणपतींचे विसर्जन देखील मिरवणुकीविना उत्सव मंडपात करण्याचा निर्णय मंडळांनी घेतला आहे. विसर्जनाच्या दिवशी महापौर सकाळी साडेदहा वाजता श्री कसबा गणपतीला हार घालतील. 

देशभरातील इतर बातम्या वाचण्यासाठी येथे क्लिक करा

पुण्यातील मानाचे व प्रमुख मंडळे यंदा गणेशोत्सव आणि संबंधित धार्मिक कार्यक्रम साधेपणाने साजरे करीत आहेत. या मंडळांचे गणेश विसर्जन देखील उत्सव मंडप व मंदिरातच होणार आहे. या बाबत पत्रकार परिषदेत माहिती देण्यात आली. या वेळी श्री कसबा गणपतीचे अध्यक्ष श्रीकांत शेटे, तांबडी जोगेश्वरी मंडळाचे अध्यक्ष राजाभाऊ टिकार, श्री गुरुजी तालीम मंडळाचे अध्यक्ष प्रवीण परदेशी, श्री तुळशीबाग मंडळाचे अध्यक्ष विवेक खटावकर, केसरीवाडा गणपतीचे अनिल सकपाळ, अखिल मंडई मंडळाचे संजय मते, श्रीमंत भाऊसाहेब रंगारी गणपती मंडळाचे अध्यक्ष संजीव जावळे, पुनीत बालन यांच्यासह नितीन पंडित, पृथ्वीराज परदेशी आदी उपस्थित होते. 
यंदा कोरोनामुळे उत्सव साधेपणाने साजरा केला. नागरिकांनीही घरीच गणरायाचे विसर्जन करावे. फिरत्या हौदांचा देखील उपयोग करावा. यामुळे कोरोनाविरुद्धची लढाई लवकर संपेल, असे आवाहन मंडळांच्या पदाधिकाऱ्यांनी केले. लोकमान्य टिळकांच्या स्मृती शताब्दीनिमित्त सोमवारी (ता. 31) मंडळांचे अध्यक्ष व पदाधिकारी एकत्रित केसरीवाड्यात आरती करून लोकमान्यांना मानवंदना देणार आहेत, असे या वेळी सांगण्यात आले. 

जगभरातील इतर बातम्या वाचण्यासाठी येथे क्लिक करा

कोणाचे किती वाजता विसर्जन 
कसबा गणपती - सकाळी 11.30 
श्री तांबडी जोगेश्वरी - दुपारी - 12.15 
श्री गुरुजी तालीम - दुपारी 1.00 
तुळशीबाग गणपती - दुपारी 1.45 
केसरीवाडा गणपती - दुपारी 2.30 
श्रीमंत भाऊसाहेब रंगारी - दुपारी 3.15 
श्रीमंत दगडूशेठ हलवाई - सूर्यास्ताला 
अखिल मंडई मंडळ - सायं. 7.00