मनोहर भोसले याची पोलिस कोठडी तीन दिवसांनी वाढली

माळेगाव : अघोरी पद्धतीने उपचार आणि आर्थिक फसवणूक केल्याप्रकरणी बारामती तालुका पोलिसांनी अटक केलेल्या मनोहरमामा उर्फ मनोहर भोसले याला आज न्यायालयात हजर केले असता पोलीस कोठडीत तीन दिवसांची वाढ (ता.१९) झाल्याचे पोलीस सूत्रांकडून सांगण्यात आले. भोसले याची पाच दिवसांची पोलिस कोठडी संपल्यामुळे त्याला आज बारामती न्यायालयात हाजर केले होते.

यावेळी न्यायालयाच्या निर्णयाकडे सर्वांचे लक्ष लागले होते.दरम्यान, बाळूमामांचा वशंज असल्याचे सांगत मनोहरमामा उर्फ मनोहर भोसले याने कर्करोगावर अघोरी इलाज केल्याची फिर्याद शशिकांत खरात यांनी दिली होती. त्यावरून मनोहर भोसले, नाथबाबा उर्फ विशाल वाघमारे आणि ओंकार शिंदे या तिघांवर बारामती तालुका पोलिस ठाण्यात गुन्हा दाखल करण्यात आला होता.

या प्रकरणी संशयित आरोपी मनोहरमामाला लोणंद( जिल्हा सातारा) नजिकच्या सालपे येथील फार्म हाऊस मधून ताब्यात घेण्यात आले होते. त्यानंतर बारामतीच्या जिल्हा व सत्र न्यायालयाने मनोहरमामाला पाच दिवसांची पोलिस कोठडी सुनावली होती. तालुका पोलिसांनी मनोहरमामाची एक्सयुव्ही कार जप्त केली आहे.

या प्रकरणातील नाथबाबा उर्फ विशाल वाघमारे आणि ओंकार शिंदे हे दोघे अद्यापपर्यंत फरार आहेत. उर्वरित आरोपींना पकडण्यासाठी व त्यांच्याकडून अधिक ची माहिती मिळण्यासाठी तपास अधिकारी तथा पोलीस निरीक्षक महेश ढवाणयांनी मनोहर भोसले याला आणखी पोलीस कोठडीत देण्याची मागणी केली असता न्यायालयाने ती मान्य केली.