दुचाकीची झाडाला धडक बसल्याने अल्पवयीन मुलाचा जागीच मृत्यू

येरवडा - शास्त्रीनगर येथील मातृछाया सोसायटी जवळ दुचाकीची रस्त्याच्या मध्ये असलेल्या झाडाला धडक बसून झालेल्या अपघातात अल्पवयीन मुलाचा जागीच मृत्यू झाला. ऋतिक पंडित सोनवणे (वय १५, रा. वैकफिल्ड वस्ती, रामवाडी) असे मृत्यू झालेल्या मुलाचे नाव असून महेश चंपालाल जहांगिर (वय १७)असे जखमी मुलाचे नाव आहे.

महेश त्याच्या आईचा लॅबमधील रिपोर्ट घेण्यासाठी दुचाकीवरून शास्त्रीनगरकडे जात होता. त्याच वेळी त्याचा मित्र ऋतिक मागे बसला होता. दरम्यान दुचाकी मातृछाया सोसायटीच्या जवळ आल्यानंतर येथील रस्त्याच्या मधोमध असलेल्या झाडाला धडक बसली. यामध्ये ऋतिकचा जागेवर मृत्यू झाला. तर महेश जखमी झाला असून त्याच्यावर खासगी रुग्णालयात उपचार सुरू आहेत. या संदर्भात येरवडा पोलिस ठाण्याचे वरिष्ठ पोलिस निरीक्षक युनूस शेख म्हणाले, ‘दुचाकीचालक अल्पवयीन असल्यामुळे त्याला बाल न्यायालयात हजर करण्यात येणार आहे.’