"लाइफलाइन' पोलिसांच्या रडारवर;तरुणीचा शोध न लागल्याने कामाची तपासणी सुरू 

पुणे - जम्बो कोविड सेंटरचे जुने व्यवस्थापन असलेली "लाइफलाइन' एजन्सी आता पोलिसांच्या रडारवर असून, उपचारासाठी गेलेल्या तरुणीचा महिनाभरानंतरही शोध न लागल्याने पोलिसांनी "लाइफलाइन'च्या कामाची तपासणी सुरू केली आहे. या तरुणीची नोंद कुठेच सापडत नसल्याचे गुरुवारी उघड झाले. तरुणी उपचारासाठी दाखल झाली होती का, तिच्यावर उपचार केले गेले का, त्यानंतर तिला घरी कधी सोडले, नसेल; तर ती कुठे गेली ? अशा प्रश्‍नांच्या चक्रव्यूहात महापालिका आणि पोलिस अडकले आहेत. 

29 ऑगस्टला दाखल झालेल्या तरुणीची माहिती देण्याबाबत महापालिकेने "लाइफलाइन'ला पत्र पाठवले आहे. मात्र, अद्याप त्यांच्याकडून कोणताही खुलासा आलेला नाही. ही घटना "लाइफलाइन'ची नेमणूक असताना झाल्याचे सांगत, त्या काळातील चौकशी करावी, अशी मागणीही महापालिकेनेही पोलिसांकडे केली आहे. . 

जगभरातील इतर बातम्या वाचण्यासाठी येथे क्लिक करा

"जम्बो'त उपचारासाठी गेलेली प्रिया गायकवाड ही तरुणी उपचारादरम्यान बेपत्ता झाल्याची तक्रार तिच्या नातेवाइकांनी पोलिसांकडे केली आहे. मात्र, आता महिना होत आला तरीही, तिचा शोध लागत नसल्याने तिच्या नातेवाइकांनी गुरुवारी "जम्बो'च्या परिसरात उपोषण सुरू केले आहे. त्यावरून पोलिसांनी व्यवस्थापनाच्या एजन्सींची चौकशी सुरू केली आहे. 

ताज्या बातम्यांसाठी डाऊनलोड करा ई-सकाळचे ऍप

"जम्बो'त उपचारासाठी दाखल झालेल्या आणि त्यानंतर बेपत्ता असलेल्या तरुणीची सविस्तर माहिती "लाइफलाइन'कडून मागविली आहे. यासंदर्भात पोलिस चौकशीला सर्व सहकार्य केले जाणार असून, वरिष्ठ पोलिस अधिकाऱ्यांशी चर्चा झाली आहे. 
-रुबल अग्रवाल, अतिरिक्त आयुक्त, महापालिका 

देशभरातील इतर बातम्या वाचण्यासाठी येथे क्लिक करा