Ravindra Dhangekar : मला दोन ते तीन महिने जेलमध्ये पाठविण्याचा पुणे पोलिसांचा प्लॅन

पुणे - 'ललित पाटील प्रकरण मी पुढे आणल्यामुळेच पुणे पोलिस माझ्यावर कारवाई करत आहेत. भाजपच्या आदेशानेच माझ्यावर खोटे गुन्हे दाखल केले जात आहे. इतकेच नव्हे, तर मला दोन ते तीन महिने जेलमध्ये घालण्याचा पोलिसांचा जुना प्लॅन आहे. पोलिस हे भाजपच्या ताटाखालचे मांजर आहेत.' अशा खरमरीत शब्दात कॉंग्रेसचे आमदार रवींद्र धंगेकर यांनी मंगळवारी पुणे पोलिसांसह भाजपवर जोरदार निशाणा साधला.

गोखलेनगर येथील महापालिकेच्या नवीन पाण्याच्या टाकीच्या उद्‌घाटनाच्या कारणावरून आमदार धंगेकर यांनी पाणी पुरवठा विभागाचे प्रमुख नंदकिशोर जगताप यांनी अर्वाच्य भाषेत शिवीगाळ केली होती. या प्रकरणाचा महापालिकेच्या अभियंता संघाने सोमवारी निषेध नोंदविल्यानंतर, जगताप यांनी चतुःशृंगी पोलिस ठाण्यात धंगेकर यांच्याविरुद्ध सरकारी कामात अडथळा आणल्याप्रकरणी गुन्हा दाखल केला होता.

धंगेकर यांनी मंगळवारी महापालिकेत पत्रकार परिषद घेऊन त्यांच्याविरुद्ध दाखल गुन्हा खोटा असल्याचे सांगत आपली बाजू मांडली. धंगेकर म्हणाले, 'पाण्याच्या टाकीच्या उद्‌घाटनासाठी सर्वपक्षीय नेत्यांना बोलवण्याचा ठराव झाला होता. तरी जगताप यांनी परवानगी न घेता कार्यक्रम घेतला. कॉंग्रसने केलेल्या कामाचे श्रेय भाजप घेत असताना संबंधित कार्यक्रमाला विरोधी पक्षाला बोलविले नाही.

माझे बोलणे ही कार्यकर्त्यांची भावना होती. भाजपच्या दबावामुळे पोलिसांकडून माझ्याविरुद्ध गुन्हा दाखल केला जात आहे. पोलिसांनी माझ्याविरुद्ध लावलेले ३५३ कलम चुकीचे आहे. मी लोकप्रतिनिधी असल्याने मला ते अडवू शकत नाहीत. आधी गुन्हा दाखल झाला, त्यानंतर मी आमदार झालो, आता परत गुन्हा दाखल झाला आहे, परत बघू काय होतं.'

महापालिका कर्मचारी संघाविरुद्ध गुन्हा दाखल करावा

महापालिकेच्या आवारातील छत्रपती शिवाजी महाराज यांच्या पुतळ्याच्या परिसरात कोणत्याही कार्यक्रमाला, सभांना, आंदोलनाला परवानगी नसल्याचे परिपत्रक जिल्हाधिकाऱ्यांनी काढले आहे. असे असताना सोमवारी महापालिकेच्या कर्मचारी संघाने तेथे निषेध सभा घेतली. कोणतीही परवानगी न घेता सभा घेण्यात आली. या सभेला जे अधिकारी उपस्थित होते, ज्यांनी भाषणे केली, त्यांच्याविरुद्ध गुन्हा दाखल करण्यात यावा.