रॉंग साईडने येणाऱ्या चारचाकीची मोटरसायकलच्या धडकेत युवकाचा मृत्यू

चारचाकी-दुचाकीच्या
धडकेत युवकाचा मृत्यू
सकाळ वृत्तसेवा
सांगोला, ता. १ : विरुद्ध दिशेने येणाऱ्या चारचाकी वाहनाने दुचाकीला समोरून जोराची धडक दिल्याने झालेल्या अपघातात दुचाकीस्वाराचा मृत्यू झाल्याची घटना २५ फेब्रुवारी रोजी सायंकाळी ७.२० वाजण्याच्या सुमारास लोटेवाडी येथील लोटेवाडी- सोनलवाडी रस्त्यावर (फॉरेस्ट परिसर, ता. सांगोला) घडली. दाजी सुखदेव गडदे (वय ३४, रा. सावे, ता. सांगोला) असे मृत युवकाचे नाव आहे.
पोलिसांनी दिलेल्या माहितीनुसार, गडदे हे दुचाकी (एमएच ४५- एडब्ल्यू १६३२) घेऊन जात असताना समोरून विरुद्ध दिशेने येणाऱ्या चारचाकी वाहनाने (एमएच १३- एझेड ८९७३) त्यांच्या दुचाकीला जोराची धडक दिली. यात गडदे गंभीर जखमी झाले. त्यांना उपचारासाठी नेण्यात येत असताना त्यांचा मृत्यू झाला. अपघातात दुचाकीचे सुमारे दहा हजार रुपयांचे नुकसान झाले आहे.
या प्रकरणी फिर्यादी बंडू दगडू गडदे (वय ४५, रा. सावे, ता. सांगोला) यांनी दिलेल्या तक्रारीवरून चारचाकी वाहनाचा चालक सादिक करीम शेख (वय ३८, रा. उमरगा, ता. उमरगा, जि. धाराशिव) याच्याविरुद्ध सांगोला पोलिस ठाणे येथे गुन्हा दाखल करण्यात आला आहे. घटनेची नोंद २८ फेब्रुवारी रोजी सायंकाळी साडेचार वाजता करण्यात आली. पुढील तपास पोलिस हवालदार घोंगडे करीत आहेत.