मोटारसायकल चोरी करणाऱ्या दोघांना बेड्या

राजगुरुनगर, ता. १८ : खेड पोलिसांच्या गुन्हे अन्वेषण पथकाने मोटारसायकल चोरी करणाऱ्या दोन चोरट्यांना अटक करून त्यांच्याकडून चार चोरीच्या गुन्ह्यातील पाच मोटारसायकल जप्त केल्या, अशी माहिती पोलिस निरीक्षक सुभाष चव्हाण यांनी दिली.
अविनाश कृष्णा विटेकर (वय २०, रा. चव्हाणमळा, ता. खेड) आणि प्रिन्स जयप्रकाश बेंद्रे ( वय २०, रा. राक्षेवाडी, ता. खेड) अशी अटक करण्यात आलेल्यांची नावे आहेत. राक्षेवाडी ( ता. खेड ) येथील आनंदनगर भागातील गुरुराज रेसिडेन्सी या इमारतीच्या पार्किंगमधून शुक्रवारी (ता. १४) दिवसा एका कामगाराची मोटारसायकल चोरीला गेली. त्यांनी खेड पोलिस ठाण्यात फिर्याद दिली. या गुन्ह्याचा तपास पोलिस निरीक्षक सुभाष चव्हाण यांच्या मार्गदर्शनाखाली गुन्हे अन्वेषण पथकातील फौजदार महेश गरड, पोलिस हवालदार संतोष मोरे, विलास साबळे, संदीप लांडे, मुकुंद कुडेकर, महेश गोसावी, प्रवीण आढारी, सूरज राक्षे व गोकूळ कोळी हे करत होते. त्यांनी या परिसरातील सीसीटीव्ही तपासले. तसेच त्यांना खबऱ्याकडून दोन सराईत चोरांची माहिती मिळाली. त्यानुसार सापळा लावून त्या दोन चोरांना ताब्यात घेतले.