बंदुकीचा धाक दाखवत गल्ल्यातली रोकड पळवली; पोलिसांनी दोघांना केली अटक

पुणे : 'तुम्हारे पास बीस लाख रुपये आया हे,' असे म्हणत व्यावसायिकाच्या पोटास पिस्तूल लावून दुकानाच्या गल्ल्यातील रोकड चोरल्या प्रकरणी दोघांना मुंढवा पोलिसांनी अटक केली आहे.

प्रवीण ऊर्फ दादा सतीश पवार (वय 36, रा. माळवाडी, मांजरी) आणि संदीप ऊर्फ राम बापू वाघ (वय 31, ता. गोपाळपट्टी, मांजरी) अशी अटक आरोपींची नावे आहेत. त्यांच्याकडून रोख 17 हजार 200 रुपये, 25 हजार रुपये किमतीचे पिस्तूल, एक हजार रुपयांचे पाच जिवंत काडतूस आणि 40 हजार रुपये किमतीची दुचाकी असा 82 हजार 200 रुपयांचा मुद्देमाल जप्त करण्यात आली आहे.

- अपयश लपविण्यासाठी राज्य सरकार दडपशाही करतंय; भाजप नेत्याची टीका​

या प्रकरणी जालाराम प्रभुजी प्रजापती (वय 45, रा. झेड कॉर्नर जवळ मांजरी) मुंढवा पोलिसांत फिर्याद दिली होती. फिर्यादी यांचा टिंबर मार्केटमध्ये लाकूड खरेदी-विक्रीचा व्यवसाय आहे. 30 ऑक्‍टोंबर रोजी दुपारी तीनच्या सुमारास आरोपी हे प्रजापती यांच्या दुकानात आले. 'तुम्हारे पास बीस लाख रुपये आया हे,' असे म्हणून त्यांनी फिर्यादींच्या पोटाला बंदूक लावली. त्यानंतर दुकानाच्या गल्ल्यात असलेली 44 हजार 500 रुपयांची रोकड चोरून पळ काढला.

पोलिस चोरट्यांचा शोध घेत असताना हा गुन्हा पवार याने वाघच्या मदतीने केल्याचे पोलिसांना समजले. त्यानुसार खबऱ्याकडून मिळालेल्या माहितीच्या आधारे दोघांना अटक करण्यात आली आहे. न्यायालयात हजर केले असता त्यांना 5 नोव्हेंबरपर्यंत पोलिस कोठडी सुनावण्यात आली आहे.

- मनसे प्रवेशाबाबत भाजपच्या माजी आमदार मेधा कुलकर्णी म्हणतात...​

पूर्व प्रादेशिक विभागाचे अप्पर पोलिस आयुक्त नामदेव चव्हाण, परिमंडळ पाचचे पोलिस उप आयुक्त नम्रता पाटील, हडपसर विभागाचे सहायक पोलिस आयुक्त कल्याणराव विधाते, मुंढवा पोलिस ठाण्याचे वरिष्ठ पोलिस निरीक्षक संपत भोसले यांच्या मार्गदर्शनाखाली तपास पथकाचे प्रमुख सहायक पोलिस निरीक्षक विजय चंदन, पोलिस अंमलदार नाना भांदुर्गे, दिनेश राणे, दत्ता विभूते, दीपक कांबळे, महेश पाठक, स्वप्नाली आंबले, नीलेश पालवे यांनी ही कारवाई केली.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)