Pune News : १४७ कोटीची झाडणकामाची वादग्रस्त निविदा रद्द! ‘सकाळ’च्या पाठपुराव्याला यश

पुणे - शहरातील रस्ते झाडण्याच्या निविदांचे काम ठरावीक ठेकेदारांचा मिळावे यासाठी महापालिकेच्या अधिकाऱ्यांनी निविदेच्या जुन्या अटी शर्तींवर झाडू फिरवून नवीन जाचक अटी टाकल्या. त्यामुळे या निविदेतील स्पर्धा कमी होऊन महापालिकेचे सुमारे ३५ कोटी पेक्षा जास्त रुपयांचे नुकसान होणार होते..‘सकाळ’ने या प्रकरणाचा भांडाफोड करून हा प्रकार चव्हाट्यावर आणला होता. या निविदेत ठरावीक ठेकेदारांसाठी पायघड्या घातल्या असून, त्यांच्यात रिंग झाल्याचे स्पष्ट झाल्याने महापालिका आयुक्त नवल किशोर राम यांनी आज (ता. ६ ) ही निविदा प्रक्रिया रद्द करण्याचा निर्णय घेतला आहे..शहरातील रस्ते, गल्लीबोळांची स्वच्छता करण्यासाठी महापालिका दरवर्षी निविदा काढली जाते. पण यंदाच्या वर्षाची निविदा ठरावीत सात-आठ ठेकेदारांनाच मिळेल यादृष्टीने पूर्वीच्या नियम व अटी बदलण्यात आल्या आहेत. हे काम अत्यावश्यक दाखवून निविदा भरण्यासाठी अवघ्या आठ दिवसाचा कालावधी देण्यात आला..यातही निविदा जाहीर होण्याच्या आधीच सर्व प्रमाणपत्र तयार असणे व चॅम्पियन मशिन खरेदी केलेली असणे आवश्यक आहे अशी अट टाकण्यात आली. त्यामुळे निविदा प्रकाशित झाल्यानंतर कागदपत्रांची जुळवाजुळव करण्याची संधी अनेक ठेकेदारांना मिळाली नाही. ज्या ठेकेदारांना आधीच नियम व अटी माहिती होत्या असेच ठेकेदार या निविदांसाठी पात्र ठरले..या निविदेत रिंग झाल्याचा संशय येऊ नये यासाठी एकाच ठिकाणी चार ते पाच जणांनी निविदा भरल्या, त्यात एकजण सोडून इतर ठेकेदार अपात्र व्हावेत यासाठी निविदेत मुद्दाम त्रुटी ठेवण्यात आल्या. त्यामुळे ठेकेदारांमध्ये ठरल्याप्रमाणे निविदांचा वाटप करण्यात आले. प्रत्येकाला दोन क्षेत्रीय कार्यालयाचे काम मिळेल अशी व्यवस्था करण्यात आली..‘सकाळ’ने यासंदर्भात सलग बातम्या देऊन हा प्रकार चव्हाट्यावर आणला, त्यामुळे ठेकेदार व अधिकाऱ्यांमध्ये खळबळ उडाली होती. या निविदांसाठीच्या नियम व अटी फक्त काही अधिकाऱ्यांनाच माहिती होत्या, क्षेत्रीय कार्यालय स्तरावरील कनिष्ठ अभियंता, सहाय्यक आयुक्तांना माहिती नव्हती हे देखील ‘सकाळ’ने पुढे आणले. त्यानंतर अधिकाऱ्यांनी क्षेत्रीय कार्यालयांमध्ये फोन करून ‘सकाळ’च्या प्रतिनिधीकडून चौकशी झाल्यास काय उत्तरे द्यावीत हे सांगण्यात आले होते..दरम्यान, या प्रकरणाची दखल घेत माजी नगरसेवक उज्वल केसकर, सुहास कुलकर्णी, प्रशांत बधे यांनी यानिविदेत ३५ कोटीचे नुकसान होत असल्याची तक्रार आयुक्तांकडे केली. नगरविकास राज्यमंत्री माधुरी मिसाळ यांनीही या प्रकरणाची चौकशी करण्याचे आदेश दिले होते.त्यामुळे अतिरिक्त आयुक्त पृथ्वीराज बी. पी. यांनी या निविदा प्रक्रियेत रिंग झाल्याचे दिसून येत आहे, त्यामुळे त्यास स्थगिती देत चौकशी केली जाईल असे सांगितले. याप्रकरणाची चौकशी करून त्यात तथ्य आढळल्याने निविदा रद्द करण्याची शिफारस आयुक्तांकडे केली होती. त्यानुसार आयुक्त नवल किशोर राम यांनी हा अहवाल मान्य करून निविदा प्रक्रिया रद्द केली आहे..झाडणकाच्या निविदेचा असा केला ‘सकाळ’ने पाठपुरावा२५ एप्रिल २०२५ - जुन्या अटी शर्तींवर फिरवला झाडू२६ एप्रिल २०२५ - दुबार खर्चाचा ‘चॅम्पियन’ फंडा ?२७ एप्रिल २०२५ - ठेकेदाराऐवजी कामगारांचे हित जपा२९ एप्रिल २०२५ - प्रशासनाचे ठेकेदारांपुढे लोटांगण८ मे २०२५ - झाडणकामाच्या निविदेत ‘रिंग’२२ मे २०२५ - झाडणकामाच्या निविदेला पुणे महापालिकेची स्थगिती२५ मे २०२५ - ठेकेदारांकडून स्पर्धेचा दिखावा३० मे २०२५ - झाडणकामाच्या निविदेचा निर्णय नवे आयुक्तच घेणार४ जून २०२५ - गोपनीय अहवाल आयुक्तांना सादर.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.