पुण्यात लष्कर परिसरात भंगार गोळा करणाऱ्या वृद्धाचा खून

पुणे : लष्कर परिसरात भंगार गोळा करून रस्त्याच्याकडेला वास्तव्य करणाऱ्या एका वृद्ध व्यक्तीच्या डोक्‍यावर वार करून खुन केला. ही घटना गुरूवारी दुपारी बारा वाजण्याच्या सुमारास उघडकीस आली. वृद्धाच्या खुनाचे कारण पोलिसांना अद्याप समजू शकलेले नाही. ईस्माईल शेख (वय 50, रा. न्यु मोदीखाना, लष्कर) असे खुन झालेल्या व्यक्तीचे नाव आहे. याप्रकरणी लष्कर पोलिसांनी अनोळखी व्यक्तीविरुद्ध खुनाचा गुन्हा दाखल करण्यात आला आहे. वरिष्ठ पोलिस निरीक्षक अशोक कदम यांनी दिलेल्या माहितीनुसार, ईस्माई शेख हे लष्कर परिसरात फिरून भंगार गोळा करीत होते.

त्यावरच ते त्यांची उपजिवीका भागवित होते. न्यु मोदीखाना परिसराती गाई-म्हशींच्या गोठ्याजवळच कापडाचे पाल टाकून ते तेथे राहात होते. संचारबंदी असल्याने त्यांना जेवण देण्यासाठी दररोज दुपारी एक व्यक्ती तेथे येत होती. त्यानुसार, गुरूवारी दुपारी बारा वाजण्याच्या सुमारास संबंधीत व्यक्ती जेवण देण्यासाठी वृद्ध नागरीकाच्या पालामध्ये गेले. त्यावेळी त्यांना वृद्ध नागरीक रक्ताच्या थारोळ्यात पडल्याचे निदर्शनास आले. त्यांनी याबाबत पोलिसांना खबर दिली. पोलिस घटनास्थळी दाखल झाले. त्यावेळी अनोळखी व्यक्तीने शेख यांच्या डोक्‍यात जड वस्तु घालून त्यांचा खुन केल्याचे निदर्शनास आले. पोलिसांनी मृतदेह ताब्यात घेऊन ससून रुग्णालयात पाठविला. अनोळखी व्यक्तीने नेमक्‍या कोणत्या कारणासाठी वृद्धाचा खुन केला, हे अद्याप स्पष्ट झाले नाही.