राष्ट्रीय परिषदेला प्रतिसाद

वडगाव मावळ, ता.१६ : श्री संत तुकाराम शिक्षण प्रसारक मंडळाच्या अध्यापक महाविद्यालयात दोन दिवसीय राष्ट्रीय परिषद पार पडली. प्रा. डॉ. अनिता धायगुडे यांनी परिषदेचे प्रास्ताविक केले. या प्रसंगी मंडळाचे अध्यक्ष तुकाराम असवले, अशोक बाफना, संचालक मंडळ उपस्थित होते. परिषदेचे पहिले बीजभाषण सीएमआर युनिव्हर्सिटी बंगलोर येथील डॉ. बालाजी बी.आर. यांचे झाले. डॉ. संजय तांबट यांनी प्रादेशिक भाषेचे महत्त्व व मातृभाषेतून शिक्षण भावी पिढीच्या प्रगतीसाठी किती महत्त्वाचे आहे, याबाबत मत मांडले. डॉ. सुरेंद्र हेरकळ यांनी विकसित भारत २०४७ यानुसार भारताला २०४७ पर्यंत पोहोचण्यासाठी काय करणे अपेक्षित आहे, याबाबत मार्गदर्शन केले. या सत्राचे सूत्रसंचालन डॉ. शीतल देवळालकर यांनी केले. आभार डॉ. दिपा नेवसे यांनी मानले.
दुपारच्या सत्रात २५ विद्यार्थ्यांनी संशोधन पेपरचे वाचन केले.
दुसऱ्या दिवशी प्राचार्य डॉ. निलू घोष यांनी ‘न्यूरोसायन्स इन एज्युकेशन फॉर सस्टनेबल डेव्हलपमेंट’ या विषयाची मांडणी केली. डॉ. नेहा देव यांनी विकसित भारत २०४७ साठी विविध योजना व त्याबाबत मार्गदर्शन केले. ज्योती रणदिवे यांनी प्रास्ताविक केले तर डॉ. अनामिका कावरे यांनी आभार मानले.
परिषदेच्या समारोपास डॉ. अनिता बेलापूरकर व डॉ. मोहन कांबळे उपस्थित होते. परिषदेच्या समन्वयक डॉ. कविता तोटे यांनी परिषदेच्या कार्याचा आढावा घेतला. उत्तम पेपर सादरीकरण केलेल्या दोन संशोधक विद्यार्थ्यांना सर्टिफिकेट देऊन सन्मानित करण्यात आले. विद्यार्थिनी ऊर्मिला करपे, पीएचडी संशोधक विद्यार्थी निकिता कांबळे, सतीश उपलाविकर यानी परिषदेबाबत मत मांडले.