नवले पुलाखाली पुन्हा अपघात; दुचाकीस्वाराचा जागीच मृत्यू

धायरी - नवले पुलाजवळ पुन्हा एकदा अपघात झाला असून सलग दुसऱ्या दिवशी आणखी एकाचा मृत्यू झाला. दुचाकीवरून निघालेल्या पुरुषाच्या डोक्यावरून ट्रकचे चाक गेल्याने त्यांचा जागीच मृत्यू झाला आहे. ही घटना मंगळवारी सकाळी सात वाजण्याच्या सुमारास नवले पुलाजवळ घडली.

प्राथमिक माहिती नुसार, अपघातात मृत्यू झालेल्या व्यक्तीचे नाव विजय रंगनाथ कुलकर्णी असं असून ते वडगांव बुद्रुकमधील ऑरा सोसायटीत राहत होते. पूजेचे साहित्य घेऊन दुचाकीवरून विजय कुलकर्णी हे सकाळी सात वाजता कात्रजच्या दिशेने जात होते. दरम्यान बोअरवेल ट्रकने त्यांच्या दुचाकीला धडक दिली. ह्यात त्यांचा जागीच मृत्यू झाला. ही घटना अण्णा वडेवाले हॉटेल समोर घडली. अपघातानंतर ट्रक चालकाला पोलिसांनी ताब्यात घेतले असून पुढील तपास सिंहगड रस्ता पोलीस करीत आहेत.

२४ तासात दुसरा अपघात

नवले पुलाखाली गेल्या २४ तासातील हा दुसरा अपघात आहे. सोमवारी सायंकाळी साडेचारच्या सुमारास अपघात झाला होता. यामध्ये पुजा कांबळे नावाच्या मुलीचा मृत्यू झाला होता. त्यानंतर पुन्हा आज सकाळी अपघातात एकाने प्राण गमावला आहे