पुणे - ब्रेक निकामी होताच ड्रायव्हर पळाला; ३ जणांचा चिरडून मृत्यू

पुणे - नवले पुलावर (Navale Bridge) होणारी अपघाताची मालिका थांबण्याची चिन्हे अजुनही दिसत नाहीत. आज मंगळवारी पुन्हा एकदा अपघात झाला असून यात ३ ते ४ जणांचा मृत्यू झाल्याची प्राथमिक माहिती मिळत आहे.नऱ्हे (Narhe) गावातील नवले पुलाजवळील भूमकर ब्रिजवर हा सकाळी साडेनऊच्या सुमारास ही दुर्घटना घडली. वाहतूक सुरळीत करण्याचे प्रयत्न भूमकर पुलाच्या उतारावर आयशर ट्रक मागे सरकला. त्यावेळी रस्त्याने जाणाऱ्या नागरिकांच्या अंगावरून आयशर ट्रक गेला. घटनेनंतर सिंहगड (Singhgad) वाहतूक विभाग आणि पोलिस घटनास्थळी दाखल झाले आहे. अपघातानंतर वाहतुकीची कोंडी झाली असून ती सुरळीत करण्यात येत आहे.

याबाबत मिळालेली माहिती अशी की, मुंबईकडून साताऱ्याकडे जाणाऱ्या आयशरचा ब्रेक निकामी झाला. यामुळे चालकाचे कंटेनरवरील नियंत्रण सुटले. त्यानंतर आयशर उताराच्या दिशेने मागे सरकल्यानंतर ड्रायव्हर पळून गेला. गाडी तशीच सोडून दिल्याने ती रस्त्यावर उभा असणाऱ्यांच्या अंगावर गेला. यात आयशर ट्रकखाली चिरडून तिघांचा जागीच मृत्यू झाला आहे. तिघेही रोजंदारी करणारे कामगार असल्याची माहिती मिळत आहे. शिवाय ट्रक काही कारना धडकला असून यात तीन ते चार जण जखमी झाले असल्याचं सांगण्यात येत आहे.

महामार्गावर अपघातानंतर मोठ्या प्रमाणावर वाहतूक कोंडी झाली आहे. सिंहगड वाहतूक विभाग तसेच सिंहगड रस्ता पोलिस ठाण्याचे सहाय्यक पोलिस निरिक्षक प्रशांत कणसे व पोलिस कर्मचारी वाहतूक सुरळीत करत आहेत. दरम्यान, अपघाताच्या ठिकाणी बघ्यांनीसुद्धा मोठी गर्दी केली आहे.