पुणेकरांना पुढील दोन दिवस मिळणार थंडीपासून सुट्टी !

पुणे : ढगाळ वातावरण निर्माण झाल्याने पुणे शहर आणि परिसरात पुढील दोन दिवसांमध्ये किमान तापमानाचा पारा १६ अंश सेल्सिअसपर्यंत वाढणार असल्याचा अंदाज हवामान खात्याने मंगळवारी व्यक्त केला. पुढील दोन दिवस आकाश अंशतः ढगाळ राहणार असून, सकाळी धुके पडेल.


पुण्यात फेब्रुवारीच्या सुरवातीला सरासरी किमान तापमान ११.६ अंश सेल्सिअस असते. यात १.८ अंश सेल्सिअसने वाढ झाली. त्यामुळे मंगळवारी सकाळी साडेआठ वाजेपर्यंत किमान तापमान १३.४ अंश सेल्सिअस नोंदले गेले. ढगाळ वातावरण असल्याने कमाल तापमान सरासरीपेक्षा १.३ अंश सेल्सिअसने कमी झाले. संध्याकाळी साडेपाचपर्यंत कमाल तापमान २९.७ अंश सेल्सिअस नोंदले.

पुणे: कॉलेज सुरू करण्यासाठी ABVPचं आंदोलन; कार्यकर्त्यांना पोलिसांनी घेतलं ताब्यात


अरबी समुद्राच्या आग्नेय भाग आणि लक्षद्वीप परिसरात काही दिवसांपासून चक्रीय स्थिती तयार होण्यासाठी पोषक वातावरण आहे. तसेच, अरबी समुद्राच्या आग्नेय भाग आणि परिसर, लक्षद्वीप परिसर ते उत्तर महाराष्ट्राची किनारपट्टीपर्यंत, अरबी समुद्राचा पूर्व भाग या दरम्यान चक्रीय वाऱ्यासाठी पोषक वातावरण तयार होत आहे. ही स्थिती समुद्रसपाटीपासून ९०० मीटर उंचीवर आहे. येत्या दोन ते तीन दिवस ही स्थिती राहण्याची शक्यता आहे. त्यामुळे राज्यात येत्या चार ते पाच दिवसात थंडी काही ठिकाणी कमी-जास्त होतील.

(Edited by : Sharayu Kakade)