निमगावात १२ एकरवरील केळीचा प्रयोग यशस्वी

दावडी, ता. १८ : श्री क्षेत्र निमगाव खंडोबा (ता. खेड) येथे पारंपरिक पिकांना पर्याय म्हणून सहा शेतकऱ्यांनी एकत्रितपणे सुमारे १२ एकर क्षेत्रावर केळीची लागवड केली आहे. टिश्यू कल्चर पद्धतीने केलेल्या या लागवडीला अवघ्या सात महिन्यांत घड येण्यास सुरुवात झाली आहे. शेतकऱ्यांचा हा प्रयोग परिसरातील शेतकऱ्यांसाठी मार्गदर्शक ठरत आहे.
राहुल मावळे व हर्षवर्धन शिंदे यांनी प्रत्येकी दोन एकर, मल्हारी शिंदे व योगेश मावळे यांनी प्रत्येकी दीड एकर तर गणेश राऊत व नारायण राऊत यांनी प्रत्येकी एक एकर क्षेत्रावर केळीची लागवड केली आहे. मायक्रोसन जी-९ (टिश्यू कल्चर) जातीच्या रोपांची २० ते २३ नोव्हेंबर २०२५ दरम्यान लागवड करण्यात आली. ठिबक सिंचन, मल्चिंग व पीक व्यवस्थापनामुळे बागांची वाढ चांगली झाली आहे.

केळी बागांमधून एकरी ३० ते ४० टन उत्पादन अपेक्षित आहे. सध्या निर्यातक्षम केळीला २० ते २५ रुपये प्रतिकिलो बाजारभाव मिळत असल्याने चांगले आर्थिक उत्पन्न मिळण्याची अपेक्षा शेतकऱ्यांनी व्यक्त केली आहे.
ग्रामोन्नती कृषी विज्ञान केंद्राचे शास्त्रज्ञ डॉ. दत्तात्रेय गावडे, निमगावचे कृषी सहाय्यक नवीनकुमार गुंडाळ, कृषी तज्ज्ञ महेंद्र भोर, अनिल सगळगिळे, शंकर गुरव तसेच प्रगतिशील शेतकऱ्यांच्या मार्गदर्शनाखाली पीक व्यवस्थापन करण्यात येत आहे.

अनुदानामुळे लागवडीचा निर्णय
पूर्वी फ्लॉवर, मका व ऊस यांसारखी पिके घेणाऱ्या शेतकऱ्यांनी आधुनिक शेतीतील संधी, उत्पादनाची क्षमता आणि फळबाग लागवडीसाठी उपलब्ध शासकीय अनुदानाचा विचार करून केळी लागवडीचा निर्णय घेतला. भीमा नदी व चासकमान डावा कालव्यामुळे परिसरात वर्षभर पाण्याची उपलब्धता असून, पाण्याचा योग्य निचरा होणारी जमीन केळी पिकासाठी पोषक ठरत असल्याचे शेतकऱ्यांनी सांगितले.

बागांच्या पाहणीसाठी शेतकऱ्यांची भेट
निमगाव परिसरात प्रथमच एवढ्या मोठ्या क्षेत्रावर केळीची लागवड झाल्याने बागांची पाहणी करण्यासाठी परिसरातील शेतकरी भेट देत आहेत. आधुनिक तंत्रज्ञान, योग्य नियोजन आणि सातत्यपूर्ण देखभालीच्या माध्यमातून पारंपरिक शेतीला फायदेशीर पर्याय निर्माण करता येतो, असा विश्वास शेतकऱ्यांनी व्यक्त केला.

निमगाव खंडोबा (ता. खेड) : केळीचा घड दाखवताना डावीकडून पहिले पंकज मावळे, दुसरे राहुल मावळे, (उजवीकडून तिसरे) मल्हारी शिंदे तसेच दुसरे हर्षवर्धन शिंदे.