मनोरुग्णालयात मृत्यूमुखी पडलेल्या रुग्णांची संख्या शंभर 

येरवडा : मनोरूग्णालयातील अस्वच्छता आणि मनुष्यबळाच्या अभावामुळे गेल्या वीस महिन्यात मृत्यूमुखी पडलेल्या रुग्णांची संख्या शंभर झाली आहे. यामध्ये विशेषत: क्षयरोग व जंतू संसर्गामुळे हे रुग्ण दगावले असून रुग्णांच्या मृत्यूची कारणे शोधण्यासाठी सत्यशोधन समितीची (डेथ ऑडिट कमिटी) स्थापना केल्याची माहिती डॉ. अभिजित फडणीस यांनी दिली. 

येरवडा प्रादेशिक मनोरूग्णालयात सध्या नऊशे पुरूष रुग्ण तर सहाशे महिला रुग्ण उपचार घेत आहेत. रुग्णालयातील अस्वच्छता आणि मनुष्यबळाच्या अभावामुळे रुग्ण मृत्यूमुखी पडण्याचे प्रमाण वाढले आहे. जानेवारी ते ऑगस्ट या आठ महिन्यात ५२ जणांचा मृत्यू झाला आहे. तर गेल्या वीस महिन्यात शंभर रुग्ण मृत्यूमुखी पडले अाहेत. या सर्वांचे मृत्यूचे कारण क्षयरोग किंवा जंतूसंसर्ग असे दिले आहे. येरवडा पोलिस ठाण्यात रुग्णांच्या आकस्मित मृत्यूची नोंद करण्यात आली आहे. 

या संदर्भात डॉ. फडणीस म्हणाले, ‘‘ रुग्णालयात अनेक वेळा बेवारस रुग्ण दाखल होत असतात. त्यासह पोलिस सुद्धा रुग्णांना दाखल करून जातात. रुग्णालयात रुग्ण येण्यापूर्वीच त्यांना अनेक गंभीर आजार असतात. त्यांची तपासणी करून उपचार करण्यापूर्वीच अशा रुग्णांचा मृत्यू होतो. त्यामुळे मृत्यूमुखी पडलेल्या रुग्णांची संख्या अधिक दिसते. यावर उपाय म्हणून रुग्णालयातील तज्ज्ञ डॉक्टरांची सत्यशोधन समिती स्थापन केली आहे. त्यामुळे भविष्यात दाखल केलेले रुग्ण मृत्यूमुखी पडणार नाहीत याची दक्षता घेतली जाणार आहे. ’’ 

गंभीर आजार असलेल्या मनोरुग्णांवर ससून रुग्णालयात तत्काळ उपचार व्हावेत म्हणून काही खाटा किंवा स्वतंत्र कक्ष देण्याची विनंती केली आहे. त्यामुळे त्यांच्याकडे विशेष लक्ष दिल्यामुळे रुग्णांना वाचविता येईल.’’
- डॉ. अभिजित फडणीस, अधिक्षक, येरवडा मनोरुग्णालय 

रुग्णांना सोब
मनोरुग्णालयातील गंभीर आजारी असलेल्या रुग्णांना उपचारासाठी ससूनमध्ये दाखल करतात. त्यांच्यासोबत दिवस-रात्रीच्या वेळेत परिचर असणे बंधनकारक आहे. मात्र अनेक परिचर रुग्णांना ससूनमध्ये दाखल करुन घरी पळ काढतात. रुग्णांच्या मृत्यूला परिचर जाबदार असल्याचा ठपका ससूनमधील डॉक्टरांनी लेखी मनोरुग्णालय प्रशासनाला कळविले आहे. तरी सुद्धा अशा बेजबाबदार परिचरांवर अद्याप कारवाई झालेली नाही.