पुणे : खडकवासला येथील गोळीबाराचे गुपित उलगडले का? 

पुणे : खडकवासला येथे रविवारी रात्री खंडणासाठी व्यावसायिकावर गोळीबार करणाऱ्या गुन्हेगारांपैकी एकाला स्थानिक गुन्हे शाखेच्या पोलिसांनी अटक केली आहे. तर अन्य आरोपीचा पोलिस शोध घेत आहेत.

ताज्या बातम्यांसाठी डाऊनलोड करा ई-सकाळचे ऍप

उदय उर्फ विक्या महेंद्र सोनवणे (वय २०, रा. किरकटवाडी) असे अटक केलेल्या संशयित आरोपीचे नाव आहे. गोळीबाराच्या या घटनेत विजय उर्फ खंडू लक्ष्मण चव्हाण (वय २५, रा. रायकर मळा, धायरी) जखमी झाले आहेत. याप्रकरणी राजू सोनवणे यांनी हवेली पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी राजू सोनवणे यांचा इलेक्ट्रिक साहित्यनिर्मितीचा व्यवसाय आहे. ते खडकवासला परिसरातील लांडगे वस्ती येथे राहायला आहेत. रविवारी रात्री साडेदहा वाजता फिर्यादी सोनवणे हे त्यांचा मित्र विजय चव्हाण याच्यासोबत बोलत थांबले होते. त्यावेळी घराजवळ असलेल्या चेतन लिमण उर्फ मामा याच्यासह ४ ते ५ जणानी ५० हजारांची खंडणी न दिल्यामुळे फिर्यादीवर गोळीबार केला.

पिंपरी चिंचवडच्या बातम्या वाचण्यासाठी येथे ► क्लिक करा

मात्र या गोळीबारात फिर्यादी यांच्याऐवजी त्यांचा मित्र विजय यास गोळी लागल्याने ते गंभीर जखमी झाले. त्यानंतर ग्रामीण पोलिसांनी या घटनेची गांभीर्याने दखल घेऊन पथके हल्लेखोरांच्या मागावर पाठविली.

दरम्यान, गोळीबार करणाऱ्यापैकी एकजण असणारा उदय हा नांदेड फाटा येथे येणार असल्याची खबर स्थानिक गुन्हे शाखेला मिळाली. त्यानुसार पोलिसांनी सापळा रचून त्यास ताब्यात घेतले. चौकशीत त्याने इतर साथीदारांच्या मदतीने हा गोळीबार केल्याची कबुली दिली.

स्थानिक गुन्हे शाखेचे पोलिस निरीक्षक पद्माकर घनवट, रामेश्वर धोंडगे, अमोल गोरे, दत्तात्रय जगताप, विजय कांचन, दत्तात्रय तांबे, गुरु जाधव, अमोल शेंडगे, एम. एस. भगत, धीरज जाधव यांच्या पथकाने ही कामगिरी केली.

पुण्याच्या बातम्या वाचण्यासाठी येथे ► क्लिक करा