पुणे - पुणे महापालिकेने नदीपात्रातील होर्डिंग पाडल्यानंतर त्याच ठिकाणी पुन्हा एक टनापेक्षा जास्त वजनाचा लोखंडी सांगडा नटबोल्टवर उभा केल्याचा धक्कादायक प्रकार समोर आला आहे. राज्यात यापूर्वी होर्डिंग पडून त्यात अनेक नागरिकांचा जीव गेल्याच्या घटना घडूनही महापालिकेचे अधिकारी याकडे दुर्लक्ष करत आहेत.
तर महापालिका कर्मचाऱ्यांवर दादागिरी करणाऱ्या होर्डिंग व्यावसायिकाविरोधात पोलिसांनी तक्रार घेतली, पण अजूनही गुन्हा दाखल केला नाही. त्यामुळे या प्रकरणात महापालिका प्रशासन व पोलिस कच का खात आहे ? असा प्रश्‍न उपस्थित होत आहे.
कसबा विश्रामबाग क्षेत्रीय कार्यालयाच्या अधिकाऱ्यांनी चुकीच्या पद्धतीने परवानग्या दिल्याने टिळक चौकात संभाजी पोलिस चौकीच्या मागच्या बाजूला नदीपात्रात एकमेकांना खेटून तीन महाकाय होर्डिंग उभे केले होते.
या प्रकरणात तीन कर्मचाऱ्यांना निलंबित केले होते, तसेच यात अनधिकृत वृक्षतोड, सीमा भितींची तोडफोड करून होर्डिंगच खांब उभारणे, शासकीय जागा असून ती खासगी भासविणे असे यासह अनेक त्रुटी या प्रकरणाच्या चौकशीत समोर आल्या होत्या. याप्रकरणात महापालिकेने बाजू मांडल्यानंतर उच्च न्यायालयाच्या आदेशानुसार हे होर्डिंग फेब्रुवारी २०२४ मध्ये पाडून टाकले होते.
महापालिकेने लोखंडी खांब कापून होर्डिंग पाडले होते. त्याच ठिकाणी पुन्हा नटबोल्ट बसवून होर्डिंग उभे केले आहे. त्यामुळे हे धोकादायक होर्डिंग कोसळल्यास पोलिस चौकीला थेट धोका पोचणार आहे. महापालिकेचे अधिकारी अशा प्रकारे होर्डिंग उभे करता येत नाही असे सांगत असले तरी त्यांची कारवाई करण्याची हिंमत झालेली नाही.
सर्व परवानग्या संपुष्टात आल्या
महापालिकेच्या कर्मचाऱ्यांवर दादागिरी करून त्यांना तेथून हुसकावून लावल्याने होर्डिंग व्यावसायिकाविरोधात सरकारी कामात अडथळा केल्याबद्दल डेक्कन पोलिस ठाण्यात कर्मचाऱ्यांनी तक्रार दाखल केली. त्यात गुन्हा दाखल झाल्याची प्रत अजूनही महापालिकेला देण्यात आलेली नाही.
दरम्यान, या तक्रारीत हे होर्डिंग अनधिकृत म्हणून पाडण्यात आले होते, ही परवानगी, वाहतूक ना हरकत, मालकाचे संमतिपत्र, वृक्ष संवर्धन ना हरकत यांची मुदत संपली आहे असेही नमूद केले आहे.
‘होर्डिंग व्यावसायिकाविरोधात पोलिसांकडे तक्रार केली, त्यात ते गुन्हा दाखल करतील. होर्डिंगच्या कागदपत्राची तपासणी कारवाई करू.’
- पृथ्वीराज बी. पी., अतिरिक्त आयुक्त
‘धोकादायक पद्धतीने होर्डिंग उभे करता येणार नाही, त्याठिकाणी कारवाई केली जाईल.’
- डॉ. राजेंद्र भोसले, आयुक्त
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.