ऑनलाइन, मॉलमुळे बेरोजगारीत वाढ

पुणे - ऑनलाइन खरेदी आणि मॉलमुळे साखळी व्यापार पद्धत विस्कळित झाली आहे. या साखळीतील वितरक हा घटक नाहीसा होत चालला आहे. त्यामुळे मालाचे वितरण करणारे आणि त्यावर अवलंबून असणारे काही लाख पुणेकर बेरोजगार होण्याची भीती ‘पुणे कंझ्युमर डिस्ट्रिब्यूटर्स असोसिएशन’च्या सदस्यांनी व्यक्त केली. 

‘सकाळ’ने आयोजित केलेल्या बैठकीत कंझ्युमर डिस्ट्रिब्यूटर्स संघटनेच्या सदस्यांनी ही माहिती दिली. या वेळी संघटनेचे अध्यक्ष संजय बोगावत, आनंद मुनोत, संदीप जालान, दिनेश मेहता, सुभाष मेहता, प्रवीण सांकला, विजय शहा, रोहित चोरडिया, राजेंद्र मेहता आणि व्यापारी महासंघाचे सचिव महेंद्र पितळिया उपस्थित होते. 

ऑनलाइन खरेदी व मॉलमुळे पारंपरिक व्यापाराची पद्धत पूर्ण बदलली. ऑनलाइन आणि मॉलमध्ये वस्तू कमी किमतीमध्ये मिळत असल्याने नागरिक त्याकडे वळतात. मात्र त्या पद्धतीत ठराविक वस्तूच कमी किमतीत मिळतात; तसेच नको असलेली खरेदीही ग्राहकाकडून करण्यात येते. त्या पद्धतीच्या प्रतिसादामुळे साखळी पद्धत विस्कळित झाली असून त्याचे दुष्परिणाम दिसू लागले असल्याचे सदस्यांनी सांगितले. सौंदर्य प्रसाधने आणि बेकरी-डेअरी आदींचे खाद्यपदार्थ यांचा समावेश फास्ट मूव्हिंग कन्झ्युमर गुड्‌समध्ये होतो. या पदार्थांची विक्री करणाऱ्या विक्रेत्यांची ही संघटना आहे.

मॉलना केवळ ‘बिझनेस टू कन्झ्युमर’ (बी टू सी) म्हणजेच विक्रेता ते खरेदीदार अशा विक्रीसच परवानगी असताना ते बेकायदा बिझनेस टू बिझनेस (बी टू बी) म्हणजेच एका व्यावसायिकाकडून दुसऱ्या व्यावसायिकास अशी विक्री करीत आहेत. ‘बी-टू-बी’मुळे आणि परकीय गुंतवणुकीस १०० टक्के परवानगी दिल्याने पारंपरिक व्यापाऱ्यांपुढे समस्या निर्माण झाल्या. सरकारने यावर लवकरात लवकर योग्य ती कारवाई करावी, अशी अपेक्षा या व्यापाऱ्यांनी व्यक्त केली.

पुणे कंझ्युमर डिस्ट्रिब्यूटर्स असोसिएशनची स्थापना १९९७
पुण्यातील व्यापाऱ्यांची संख्या सुमारे १०००
संघटनेची सदस्य संख्या ३८०
शहरातील वार्षिक उलाढाल १० हजार कोटी