काँग्रेसच देश सांभाळू शकते - नाना पटोले

पुणे - भाजपकडून (BJP) केंद्रीय तपास यंत्रणांचा दुरुपयोग करणे सुरू आहे. त्याला जनता कंटाळली आहे. राहुल गांधी (Rahul Gandhi) यांच्याकडे व्हिजन (Vision) आहे. या देशाला पुढच्या काळात काँग्रेस (Congress) सांभाळू शकते, असा दावा काँग्रेसचे प्रदेशाध्यक्ष नाना पटोले (Nana Patole) यांनी बुधवारी पत्रकारांशी बोलताना केला.

पुण्यात कार्यक्रमासाठी आले असताना पत्रकारांनी त्यांची भेट घेतली. त्या वेळी ते बोलत होते. सोनिया गांधी या ‘यूपीए’चे नेतृत्व करण्यास सक्षम आहेत, असे ट्विट पाटोले यांनी केले होते. त्यावर विचारले असता ते म्हणाले, ‘‘देशपातळीवर भाजपला मोडीत काढायचे असेल, तर काँग्रेसशिवाय पर्याय नाही. राज्य पातळीवरील पक्षांनी याचा विचार केला पाहिजे. नाही केला तर ती भाजपला मदत करण्यासारखे आहे.’’

पक्षाच्या आमदारांनी सोनिया गांधी यांना भेटीची वेळ मागितली आहे, त्यावर बोलताना ते म्हणाले, ‘‘हे तीन पक्षाचे सरकार आहे. थोडं कमी जास्त होणारच. आमदार आपल्या मतदार संघात काम. करतात त्यांना पक्ष अध्यक्षांना भेटायची इच्छा असते ते भेटू शकतात. त्यासाठी भाजपच्या प्रमाणपत्राची गरज नाही. सोनिया गांधी आणि राहुल गांधी यांना आमदार भेटायला जाणार आहे, त्याचा इतका बाऊ विरोधक का करत आहेत. हे कळत नाही.’’

राष्ट्रवादी युवक काँग्रेसने शरद पवार यांना ‘युपीए’चे अध्यक्ष करावे, असा ठराव केला आहे. त्यावर पटोले म्हणाले, ‘‘राष्ट्रवादीने काय ठराव करायचा हा त्या पक्षाचा प्रश्न आहे. पण देशात भाजपला काँग्रेसच पर्याय आहे. त्यामुळे कोणी काय ठराव करायचा त्यांचा प्रश्न.’’

कोकणाला निसर्गाने भरभरून दिले. पण पाहिजे तसा विकास तिथे झाला नाही. नाणारबद्दल गैरसमज होतील असे वातावरण पसरवले आहे. सरकारने यासाठी पुढाकार घ्यावा आणि लोकांमधील गैरसमज दूर करावा. तरीही लोकांचा विरोध असेल तर विदर्भात जागा आहे. तिथे हा प्रकल्प घेऊन जाऊ शकतो. पश्चिम महाराष्ट्रात जागा आहे, राज्याच्या बाहेर जाऊ नये याची काळजी घ्यावी. या प्रकल्पामुळे निसर्गाला कुठेही हानी पोचणार नाही असं मी ऐकलंय.

- नाना पटोले, प्रदेश अध्यक्ष, काँग्रेस