कांद्यास वाढत्या उष्णतेचा ओतूर परिसरामध्ये फटका

ओतूर, ता.२१ : ओतूर व परिसरात (ता.जुन्नर) उन्हाची तीव्रता वाढत आहे. त्याचा कांदा पिकास फटका बसत आहे. त्यामुळे औषध फवारणीचा खर्च वाढल्याने शेतकऱ्यांची चिंता वाढली आहे. ओतूरला सकाळी दव पडते तर दुपारी उन्हाचा पारा वाढतो. यामुळे उत्पादन खर्चात वाढ होत आहे.
तालुक्यातील ओतूर, उदापूर, डिंगोरे, बल्लाळवाडी, नेतवड, माळवाडी, पिपंळगाव जोगा, कोळवाडी, वाटखळ, मढ, पारगाव, खिरेश्वर, सांगनोरे, मांदारणे, रोहकडी, खांमुडी आदी गावांत उन्हाची तीव्रता वाढल्यामुळे कांद्यावर करपा, बुरी, मव्याचा प्रादुर्भाव वाढत आहे. तापमान वाढीमुळे लाल कोळी रोगाचा ही प्रादुर्भाव दिसू लागला आहे. शेतकऱ्याला कांदा पिकावर मोठ्या प्रमाणात औषध फवारणी करावी लागत आहे. मागास कांद्याच्या फुगवणीवर मोठा परिणाम होणार आहे. हरभऱ्यावर हिरवी आळी, काळा मवा, तांबेरा, तुडतुडे या रोगांचा प्रादुर्भाव होत असल्याचे दिसून येत आहे. त्यामुळे शेतकरी औषध फवारणी करून पिके वाचवण्याचा प्रयत्न करत आहे.
एकूणच उन्हाचा चटका वाढल्याने शेतीमालाच्या विशेषता कांद्याच्या उत्पादन खर्चात वाढ होणार असून उत्पादनात ही घट होणार आहे, असे दिसून येते आहे.

01566