पालखी सोहळा अध्यात्मिक पर्वणी : आमदार दत्तात्रय भरणे

इंदापूर : ''इंदापूर तालुक्यातून पालखी सोहळ्याचे किमान ७ ते ८ लाख वारकरी आषाढी वारीसाठी पंढरपूरला जातात. पालखी सोहळे तालुक्यास अध्यात्मिक पर्वणी असून त्याचा आनंद व्दिगुणीत करण्यासाठी शासन, प्रशासन तसेच नागरिकांनी वारकऱ्यांना मुलभुत सुविधा पुरवण्यास सर्वोच्च प्राधान्य द्यावे.'' असे आवाहन आमदार दत्तात्रय भरणे यांनी केले.

इंदापूर पंचायत समितीच्या लोकनेते शंकरराव पाटील सभागृहात पालखी सोहळा नियोजन बैठकीत आमदार भरणे अध्यक्षीय मार्गदर्शन करताना बोलत होते. यावेळी तहसिलदार सोनाली मेटकरी, गटविकास अधिकारी माणिकराव बिचकुले, पोलीस निरीक्षक मधुकर पवार, नगराध्यक्षा अंकिता शहा, हनुमंत बंडगर, महारूद्र पाटील, सतिश पांढरे व बाळासाहेब काळे, मुकूंद शहा, संजीव लोंढे उपस्थित होते. 

काँग्रेस नगरपरिषद गट नेते कैलास कदम यांनी पालखी तळ व्यवस्थापनासाठी ५० लाख व पाणी टंचाई परिस्थितीत नगरपरिषदेस चारी वाढविण्यासाठी १० लाख रूपये, नगरसेवक अनिकेत वाघ यांनी उपजिल्हारूग्णालयात मनुष्यबळ तसेच औषध साठा वाढविण्यासाठी तर नगरसेवक श्रीधर बाब्रस यांनी वारकरी सर्वत्र उतरत असल्याने शहरातील सर्व रस्त्यांची दुरूस्ती करण्याची मागणी केली. यावेळी भरणे म्हणाले, ''भीषण दुष्काळी परिस्थितीत लाखो वारकरी तालुक्यात येणार आहेत. आपल्याकडे पाणी टंचाई असताना देखील 'अतिथी देवो भव' या तत्वाने सर्व वारकऱ्यांची सेवा करण्याची संधी आपणास मिळाली आहे. वारकरी आनंदी राहतील असे काम सर्वांनी करणे गरजेचे आहे. सोहळा यशस्वितेसाठी सर्वांनी एकत्रित प्रयत्न करावेत,'' असे आवाहन त्यांनी केले.
  

यावेळी भाजपा तालुकाध्यक्ष नानासाहेब शेंडे, राष्ट्रवादी काँग्रेसचे शहराध्यक्ष अनिल राऊत यांच्यासह बेलवाडी, निमगाव केतकी, सराटी, निरवांगी, भिगवण गावच्या प्रतिनिधींनी पालखी कामासंदर्भात कैफीयती सादर केल्या. यावेळी रघुनाथ गोफणे, मोहन सुळ, डॉ. एकनाथ चंदनशिवे, रामनिवास झंवर, विनायक गुळवे, डॉ. सुरेखा पोळ यांनी आपल्या विभागाचा आढावा सादर केला. यावेळी पालखी मुक्कामी ७०० शौचालये, पाण्यासाठी ३०० टँकर्स, मुक्काम ठिकाणी २४ तास वीज, बेलवाडी व इंदापूर रिंगण सोहळा सुविधा, केरोसिन व गॅस, प्लॅस्टीक व कचरा निर्मुलन,पाणी निर्जंतुकीकरण, ६ प्राथमिक आरोग्य केंद्र व २ ग्रामिण रूग्णालयात पुरेसे डॉक्टर, कर्मचारी व औषधे आदींचे नियोजन झाले. 

इंदापूर उपजिल्हारूग्णालयाचे वैद्यकियअधिक्षक तथा निमगाव केतकी ग्रामिण रूग्णालयाचे प्रमुख डॉ. राजेश मोरे हे पुर्वसुचना देवून सुध्दा यावेळी गैरहजर राहिले. त्यांच्या कार्यपध्दतीबद्दल सर्वाधिक तक्रारी आहेत. विशेष म्हणजे संतश्रेष्ठ तुकाराम महाराज पालखी सोहळ्याचा मुक्काम निमगाव केतकीस असतो. त्यामुळे डॉ. मोरे यांच्यावर शिस्तभंगाची कारवाई करावी अशी मागणी नानासाहेब शेंडे यांनी केली. त्याची दखल आमदार भरणे यांनी घेवून तहसिलदार मेटकरी यांना सुस्पष्ट अहवाल पाठविण्याची सुचना केली.