दलित महासंघाच्या वतीने गरीब विद्यार्थ्यांना शालेय साहित्याचे वाटप

PNE26V98667
पंढरपूर : शालेय विद्यार्थ्यांना दप्तर वाटपप्रसंगी लक्ष्मण शिरसट, रमेश कांबळे, विनायक संगीतराव, समाधान घाडगे, किशोर जाधव आदी.
---
दलित महासंघाच्या वतीने
शालेय साहित्याचे वाटप
सकाळ वृत्तसेवा
पंढरपूर, ता. २४ : संत गाडगेबाबा जयंती आणि दलित महासंघाच्या वर्धापन दिनाचे औचित्य साधून नगरपालिका मराठी शाळेतील गरीब व गरजू विद्यार्थ्यांना मंगळवारी (ता. २४) शालेय साहित्य व दप्तर मोफत वाटप करण्यात आले. दलित महासंघाचे जिल्हाध्यक्ष रमेश कांबळे यांच्या पुढाकारातून या सामाजिक उपक्रमाचे आयोजन करण्यात आले होते.
येथील लोकमान्य विद्यालयात दप्तर वाटपाचा कार्यक्रम झाला. नगरपालिकेचे माजी नगराध्यक्ष व नूतन नगरसेवक लक्ष्मण शिरसट यांच्या हस्ते विद्यार्थ्यांना दप्तर वाटप करण्यात आले. गरीब व गरजू विद्यार्थ्यांना शालेय साहित्याचे वाटप करून दलित महासंघाच्या पदाधिकाऱ्यांनी सामाजिक बांधिलकी जपली आहे. नगरपालिकेत शिकणाऱ्या मुलांना कोणतीही शैक्षणिक उणीव भासू दिली जाणार नाही. सर्व सोयीसुविधा उपलब्ध करून दिल्या जातील, असे आश्वासन माजी नगराध्यक्ष लक्ष्मण शिरसट यांनी यावेळी दिले.
कार्यक्रमास नगरसेवक विनायक संगीतराव, प्रियांका तारापूरकर, सुनील डोंबे, किशोर जाधव, सागर तारापूरकर, लोकमान्य विद्यालयाचे मुख्याध्यापक आराध्ये, केंद्रप्रमुख तानाजी बोड्रे, मुख्याध्यापक समाधान घाडगे आदींसह पदाधिकारी, शिक्षक व विद्यार्थी मोठ्या संख्येने उपस्थित होते.