पानिपत येथील स्मारकाची दुरवस्था दूर करणार : डॉ. नीलम गोऱ्हे

पुणे : पानिपत येथील मराठा स्मारकाची दुरवस्था झाली असून, ती दूर करावी अशी मागणी पानिपत येथे झालेल्या युद्धानंतर तेथेच स्थायिक झालेल्या रोड मराठा समाजाच्या शिष्टमंडळाने विधान परिषदेच्या उपसभापती डॉ. नीलम गोऱ्हे (Nilam Gorhe) यांच्याकडे केली. त्यावर पानिपत येथील स्मारकाची दुरवस्था दूर करण्याबाबत प्रयत्न करण्यात येतील, असे आश्वासन त्यांनी शिष्टमंडळाला दिले.

पानिपत येथे सदाशिवभाऊ पेशवे यांचा पुतळा उभारावा, हरियाना राज्यात छत्रपती शिवाजी महाराज यांचा पुतळा स्थापन करावा. तसेच, ग्रंथालय उभारण्यात यावे, यासह इतर मागण्या शिष्टमंडळाने केल्या. त्यावर डॉ. गोऱ्हे यांनी लोकसभेचे अध्यक्ष ओमप्रकाश बिर्ला, मुख्यमंत्री उद्धव ठाकरे आणि पर्यावरण मंत्री आदित्य ठाकरे यांच्याकडे साहाय्याने हा प्रश्न सोडविण्यात येईल, असे आश्वासन दिले.

तसेच, छत्रपती शिवाजी महाराज यांच्या विचारानुसार महाराष्ट्रातील आणि हरियानात स्थायिक झालेले मराठी बांधव यांचा संपर्क स्थापित करण्यात येईल, असे त्यांनी सांगितले. या प्रसंगी रोड मराठा समाजाचे कमलजित महाले, सुरेंद्र दाभाडे, चंद्रकांत मोकाटे, विराज तावरे आदी उपस्थित होते.