पुणे : पत्रकार भवनच्या उभारणीत शंकरराव कोल्हे यांचा सिंहाचा वाटा

पुणे : दिव़ंगत माजी मंत्री व सहकार क्षेत्रातील ज्येष्ठ नेते कै. शंकरराव कोल्हे यांचे पुण्यातील पत्रकार भवनाच्या इमारतीसाठी सरकारी जागा मिळवून देण्यात सिंहाचा वाटा आहे. कोल्हे यांच्या आग्रहामुळेच या इमारतीसाठी सहा हजार चौरस फूट जागा मिळाली आणि सध्याचे भव्यदिव्य पत्रकार भवन साकारू शकले, अशा विविध आठवणींना उजाळा देत, दिवंगत कोल्हे यांना श्रद्धांजली अर्पण करण्यात आली.

पुणे पत्रकार प्रतिष्ठान आणि पुणे श्रमिक पत्रकार संघाच्यावतीने शनिवारी (ता.२६) श्रद्धांजली सभा आयोजित करण्यात आली होती. या श्रद्धांजली सभेत बोलताना पुण्यातील ज्येष्ठ पत्रकारांनी कोल्हे यांच्या आठवणींना उजाळा दिला. यावेळी पुणे श्रमिक पत्रकार संघाचे अध्यक्ष मंगेश कोळपकर, सरचिटणीस डॉ. सुजित तांबडे, प्रतिष्ठानचे कार्यवाह गजेंद्र बडे, प्रतिष्ठानचे खजिनदार प्रकाश भोईटे, प्रतिष्ठानचे माजी अध्यक्ष उमेश घोंगडे आदी उपस्थित होते.

पुण्यातील पत्रकार भवनासाठी पत्रकारांनी राज्य सरकारनकडे तीन हजार चौरस फूट जागेचीच मागणी केली होती. तेव्हा शंकरराव कोल्हे हे महसूलमंत्री होती. त्यामुळे त्यावेळी कोल्हे यांनी तीन हजार चौरस फुटांऐवजी आग्रह करत आणि त्यामागील भूमिका स्पष्ट करत सहा हजार चौरस फूट जागा उपलब्ध करून दिल्याची आठवण पत्रकार प्रतिष्ठानचे माजी अध्यक्ष राजीव साबडे यांनी सांगितली.

या श्रद्धांजली सभेत साबडे यांच्यासह ज्येष्ठ पत्रकार किरण ठाकूर, चंद्रकांत दिक्षीत, जयराम देसाई, सुनील माळी आणि राष्ट्रवादी काँग्रेसचे प्रवक्ते अंकुश काकडे यांनी कोल्हे यांच्या आठवणींना उजाळा दिला.