खेडकर, सातारकर, वैराळकर यांना कै.पठ्ठे बापूराव प्रतिष्ठानचा पुरस्कार जाहीर

हडपसर : कै.पठ्ठे बापूराव प्रतिष्ठान व सांस्कृतिक कला मंडळाच्या वतीने देण्यात येणारा राज्यस्तरीय ‘पठ्ठेबापूराव पुरस्कार’ संगमनेर येथील ज्येष्ठ तमाशा कलावंत रघुवीर खेडकर यांना जाहीर झाला आहे. तसेच लोकसाहित्याचे अभ्यासक डॉ.भास्करराव खांडगे पुरस्कार वाई येथील लावणी गायिका व नृत्यांगना पुष्पा सातारकर यांना तर, तमाशा साहित्यिक बापूसाहेब जिंतीकर पुरस्कार जेष्ठ गझलकार व शाहीर सुरेशकुमार वैराळकर यांना देण्यात येणार आहे, अशी माहीती प्रतिष्ठानचे संस्थापक जयप्रकाश वाघमारे व कार्याध्यक्ष प्रा.सत्यजीत खांडगे  यांनी दिली.

प्रतिष्ठानचे अध्यक्ष देविदास पाटील, कार्याध्यक्ष सत्यजित खांडगे, महोत्सव समितीचे अध्यक्ष मित्रावरुण झांबरे यांच्यासह पुरस्कार निवड समिती सदस्य लावणी नृत्यांगना रेश्मा परितेकर, डॉ. शंतनू जगदाळे, संदीप घुले, बापू जगताप, आकाश वाकचौरे यावेळी उपस्थित होते.पठ्ठे बापुराव पुरस्कार २१ हजार रुपये, भास्करराव खांडगे पुरस्कार १५ हजार रुपये, बापूसाहेब जिंतीकर पुरस्कार ११ हजार रूपये स्मृतीचिन्ह, शाल व श्रीफळ असे पुरस्काराचे स्वरूप आहे. पुरस्काराचे हे २३ वर्ष असूनलोककला क्षेत्रात उल्लेखनीय कार्य करणाऱ्या व्यक्तींना हे पुरस्कार दिले जातात.

बुधवारी (ता. २२) बालगंधर्व रंगमंदिर, पुणे येथे सायंकाळी ५ वाजता पुरस्कार वितरण समारंभ आयोजित केलेला आहे. या कार्यक्रमाच्या निमित्ताने दुपारी १ ते रात्री ८ वाजेपर्यंत ‘पुणे लावणी महोत्सवाचे’ही आयोजन करण्यात आलेले आहे. शाहीर अमर पुणेकर, जय अंबिका कला केंद्र सणसवाडी, कविता बंड निर्मित ढोलकीचा खणखणाट घुंगरांचा छनछनाट, आर्यभूषण थिएटर, पुणे येथील लोककलावंत यावेळी आपली कला सादर करणार आहेत. महिलांसाठी बाल्कनी राखीव ठेवण्यात आलेली आहे. लोककलेचा प्रचार व प्रसार होण्यासाठी सर्वांना प्रवेश विनामूल्य उपलब्ध करून दिलेला आहे.