आंबेगाव तालुक्यात लांडेवाडी येथे पाच हजार ५५५ रोपांचे महावृक्षारोपण

मंचर - “दिवसेंदिवस वाढत जाणारे तापमान चिंताजनक आहे. पर्यावरणाचा समतोल राखण्यासाठी पक्षी, प्राणी, मानव यांच्या संरक्षणासाठी व पुरेश्या प्रमाणात ऑक्सिजन निर्मितीसाठी प्रत्येक गावात वृक्षलागवड व संवर्धनाची चळवळ रुजली पाहिजे. त्यासाठी जनजागृती अत्यंत महत्वाची आहे. या प्रश्नाकडे सर्वांनी गांभीर्याने लक्ष द्यावे.”असे आवाहन शिवसेनेचे उपनेते व माजी खासदार शिवाजीराव आढळराव पाटील यांनी केले.

लांडेवाडी- चिंचोडी (ता.आंबेगाव) येथे जुन्नर वन व मंचर वन परिक्षेत्र विभागाच्या वतीने आठ हेक्टर जागेत पाच हजार ५५५ रोपांचे महावृक्षारोपण आढळराव पाटील व जुन्नर वन विभागाचे उपवनसंरक्षक अमोल सातपुते यांच्या यांच्या हस्ते झाले. यावेळी झालेल्या कार्यक्रमात आढळराव पाटील बोलत होते. न्यु इंग्लिश स्कूल व शिवाजीराव आढळराव पाटील विद्यालयाच्या विद्यार्थ्यांनी रोपांची लागवड केली.

यावेळी “झाडे लावा, झाडे जगवा” या घोषणांनी परिसर दुमदुमून गेला होता. या प्रसंगी जुन्नर वन विभागाचे सहाय्यक उपवनसंरक्षक संदेश पाटील, मंचर वनपरिक्षेत्र अधिकारी स्मिता राजहंस, घोडेगावचे वनपरिक्षेत्र अधिकारी महेश गारगोटे, खेडचे वन परिक्षेत्र अधिकारी प्रदीप रौधळ, सरपंच अंकुश लांडे पाटील, उपसरपंच सुभाष लांडे, रामदास आढळराव पाटील, श्याम गुंजाळ, श्यामल चौधरी,मुख्याध्यापक सुरेश डोके उपस्थित होते.

सातपुते म्हणाले “वृक्ष सवर्धनाची जबाबदारी येथील विद्यार्थ्यांनी स्वीकारली आहे. दरवर्षी वृक्षासमावेत सदर विद्यार्थी सेल्फी काढतील.तीन वर्ष वृक्षाचे उत्कृष्ठ संगोपन केलेल्या विद्यार्थ्यांना बक्षीस दिले जाईल. आढळराव पाटील यांनी वृक्ष संगोपनासाठी पाण्याची व्यवस्था केली आहे. त्याचे सहकार्य निश्चित कौतुकास्पद आहे.”

“ डोंगर उतारावर चिंच, जांभूळ, आंबा,कवठ,साग, कडुलिंब, आवळा, हिरडा आदी आर्थिक उत्पन्न देणारे वृक्ष लावले आहेत. वन खात्याप्रमाणेच विद्यार्थी व ग्रामस्थांनी वृक्षांचे संवर्धन व संरक्षण करावे.”

- स्मिता राजहंस, वनपरिक्षेत्र अधिकारी, मंचर.