भाड्याच्या बंगल्यात पोकर जुगाराचा अड्डा

पुणे : भाड्याने घेतलेल्या बंगल्यामध्ये अवैधरीत्या पोकर जुगार खेळण्यात येत असल्याचा धक्कादायक प्रकार उघडकीस आला आहे. गुन्हे शाखेच्या पथकाने टाकलेल्या छाप्यात हा प्रकार पुढे आला असून बंगल्यातून विदेशी मद्य, परकीय चलन, जुगाराची सामुग्रीसह 58 लाख रुपयांचा ऐवज पोलिसांनी जप्त केला आहे. जितेन जगदिप सिंग (वय 41, रा.सैनिक नगर, क्‍लाऊड नाईन सोसायटी, बंगला नंबर 16, कोंढवा) असे अटक केलेल्या संशयित आरोपीचे नाव आहे. त्याच्याविरुद्ध महाराष्ट्र जुगार, मटका प्रतिबंधक कायद्यानुसार कोंढवा पोलिस ठाण्यात गुन्हा दाखल करण्यात आला. पोलिसांनी दिलेल्या माहितीनुसार, जितेन जगदिप सिंग इव्हेंट मॅनजमेंट करण्याचे काम करतो. त्याने कोंढव्यातील सैनिकनगर जवळ एक बंगला भाडेतत्वावर घेतला होता. संबंधित बंगल्यामध्ये काही व्यक्ती पोकर जुगार खेळतात तसेच त्यांना संबंधित व्यक्ती विदेशी मद्य पुरविते, अशी खबर पोलिसांना मिळाली होती. त्यानुसार, पोलिसांकडून संबंधित माहितीची खातरजमा करण्यात आली. त्यानंतर पोलिसांच्या पथकाने बंगल्यावर छापा टाकला.