Pune Crime : मोकाच्या गुन्ह्यातील सराईत गुन्हेगारांना कर्नाटकातून अटक

पुणे : संघटित गुन्हेगारी नियंत्रण (मोका) कायद्यांतर्गत गुन्हा दाखल असलेल्या दोन सराईत गुन्हेगारांना गुन्हे शाखेच्या पथकाने कर्नाटक राज्यातील बंगळूरमधून, तर अन्य एकाला अहदमनगरमधून अटक केली. या आरोपींविरुद्ध वाहनांची तोडफोड करण्यासह इतर गंभीर स्वरुपाचे गुन्हे दाखल आहेत.

अजय चंद्रकांत विटकर (वय २२), ऋषिकेश ऊर्फ बबल्या सुनील देवकुळे (वय १९) आणि अनिकेत ऊर्फ डॅनी शंकर मंगळवेढेकर (वय २२, तिघे रा. वडारवाडी, गोखलेनगर) अशी अटक केलेल्यांची नावे आहेत.

पोलिस आयुक्त रितेश कुमार आणि पोलिस सह आयुक्त संदीप कर्णिक यांनी मोका आणि विविध गुन्ह्यांतील फरारी आरोपींना अटक करण्याचे आदेश दिले आहेत.

चतु:शृंगी पोलिस ठाण्यात दाखल मोकाच्या गुन्ह्यातील तिघे सराईत गुन्हेगार फरार होते. त्यापैकी विटकर आणि देवकुळे हे दोघे बंगळूर शहरात लपून राहत असल्याची माहिती गुन्हे शाखेतील युनिट चारच्या पथकाला मिळाली. त्यानुसार या पथकाने दोघांना बंगळूरमधून ताब्यात घेतले.

तसेच, अनिकेत मंगळवेढेकर हा अहमदनगर एमआयडीसी परिसरात लपून बसल्याची माहिती मिळाली. त्यानुसार युनिट चारच्या पथकाने त्याला ताब्यात घेतले. गुन्हे शाखेचे पोलिस उपायुक्त अमोल झेंडे आणि सहायक पोलिस आयुक्त सतीश गोवेकर यांच्या मार्गदर्शनाखाली युनिट चारचे वरिष्ठ पोलिस निरीक्षक गणेश माने यांच्या पथकाने ही कारवाई केली.