पोलिस असल्याचे सांगत तरुण-तरुणीचं केलं अपहरण; पोलिसांनी ९ जणांना घेतलं ताब्यात

पुणे : पोलिस असल्याची बतावणी करुन टोळक्‍याने तरुण-तरुणीचे शनिवारी (ता.29) सायंकाळी सेनापती बापट रस्ता येथून अपहरण केले होते. याप्रकरणाचा पोलिसांनी तत्काळ शोध घेऊन नऊ जणांना अटक केली. दरम्यान, हा सर्व प्रकार कौटुंबिक कारणातून घडल्याचे पोलिसांनी सांगितले. 

दत्तात्रय भोईटे (वय 34) संदीप जाधव (वय 28), अक्षय दीक्षित (वय 26), सागर कोळेकर (वय 23), मंगेश खंडजोडे (वय 18), शुभम बरकडे (वय 20), मंगेश शिंदे (वय 21), राहुल बरकडे (वय 27), किरण बाबर (वय 23, सर्व रा.सातारा) अशी अटक केलेल्या संशयित आरोपींची नावे आहेत. याप्रकरणी ऋतिक मोहिते (वय 27, रा. पर्वती दर्शन) यांनी चतु:शृंगी पोलिस ठाण्यात फिर्याद दिली आहे.

- रुग्णांना रक्त कमी पडू देणार नाही; कार्यकर्त्यांनी घेतली 'श्रीं'चरणी शपथ!​

फिर्यादी हे सेल्समन असून ते त्यांच्या ऑफिसमधील सहकारी तरुणीशी शनिवारी सायंकाळी साडे सात वाजता सेनापती बापट रस्ता येथील स्टार बाजार मार्केट येथे बोलत थांबले होते. त्यावेळी तेथे आलेल्या एका कारमधील व्यक्तींनी त्यांना पोलिस असल्याची बतावणी करुन त्यांना जबरदस्तीने कारमध्ये बसविले. त्यानंतर फिर्यादीस कात्रज येथे मारहाण करुन सोडून दिले. तर तरुणीला घेऊन गाडी साताऱ्याच्या दिशेने गेली.

दरम्यान, फिर्यादीने चतुःश्रृंगी पोलिसांशी संपर्क साधून घडलेल्या घटनेची माहिती दिली. त्यानंतर पोलिसांनी तत्काळ गाडीचा शोध घेऊन शनिवारी पहाटे साडे तीन वाजता संबंधीत गाडी सातारा टोलनाक्‍यावरुन ताब्यात घेतली. तरुणीची सुटका केल्यानंतर संशयित आरोपींना ताब्यात घेऊन त्यांच्याकडे चौकशी केली. त्यावेळी कारमधील व्यक्ती ह्या मुलीच्या कुटुंबातील असल्याची आणि कौटुंबिक कारणातून त्यांनी मुलीला आणि तिच्या सहकाऱ्याला जबरदस्तीने गाडीत बसवून नेल्याची माहिती दिली. न्यायालयाने संशयीत आरोपींना दोन तारखेपर्यंत पोलिस कोठडी दिली असल्याची माहिती परिमंडळ चारचे पोलिस उपायुक्त पंकज देशमुख यांनी दिली. 

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)