PSI Suspended : लोणी काळभोर पोलिस ठाण्यातील पोलिस उपनिरीक्षक निलंबित

उरुळी कांचन - थेऊर येथील एका महिलेच्या खून प्रकरणातील मुख्य आरोपीच्या विरोधातील पुरावे नष्ट करण्याचा प्रयत्न करून आरोपीस अप्रत्यक्षपणे सहकार्य केल्याच्या आरोपावरून लोणी काळभोर पोलिस ठाण्याचे उपनिरीक्षक अमोल घोडके यांच्यावर निलंबनाची कारवाई करण्यात आली आहे, याबाबतचे आदेश अप्पर पोलिस आयुक्त मनोज पाटील यांनी काढले आहेत.

या संदर्भात अधिक माहिती अशी की, लोणी काळभोर पोलिस स्टेशनच्या हद्दीतील थेऊर येथील अक्षय चव्हाण व त्यांची पत्नी शीतल चव्हाण यांनी काही दिवसांपूर्वी सराईत गुन्हेगार भरत तुकाराम जैद व त्याच्या इतर साथीदारांना लघुशंका करताना हटकले होते. यावेळी आरोपींनी त्यांना मारहाण करत दगडफेक करून गोळीबार केला होता.

यात शीतल चव्हाण यांच्या डोक्यात दगड लागून त्या गंभीर जखमी झाल्या होत्या. त्यांना खासगी रुग्णालयात उपचारासाठी दाखल केले असता त्यांचा मृत्यू झाला. याप्रकरणी जैद टोळीवर लोणी काळभोर पोलिसांनी खुनाचा गुन्हा दाखल केला आहे.

त्यानंतर जैद टोळीचे आजवरचे कारनामे लक्षात‌ घेवून टोळीप्रमुख भरत जैद व त्याच्या इतर सात साथीदारांवर महाराष्ट्र राज्य संघटीत गुन्हेगारी कायद्यांतर्गत (मकोका) कारवाई करण्याचा प्रस्ताव लोणी काळभोर पोलिस ठाण्याचे वरिष्ठ पोलिस निरीक्षक राजेंद्र पन्हाळे यांनी परिमंडळ ०५ चे पोलिस उपायुक्त डॉ. राजकुमार शिंदे यांच्या मार्फत पोलिस‌ आयुक्तांना सादर केला होता. यानुसार जैद टोळीवर मकोका कायद्यांतर्गत कारवाई करण्यात आली आहे.

दरम्यान, चव्हाण दांपत्याला मारहाण व महिलेच्या खुनाचा तपास पोलिस उपनिरीक्षक अमोल घोडके यांच्याकडे होता. मुख्य अरोपी गाडीत नव्हता, व तो त्या रस्त्याने गेलाच नाही असे घोडके यांनी तपास अहवालात नमूद केले होते. तपास करताना घोडके यांनी गुन्ह्यात मुख्य आरोपी असलेल्या गुन्हेगारास अप्रत्यक्षरित्या मदत केल्याचे निष्पन्न झाले आहे.

त्यामुळे घोडके यांच्यावर निलंबनाची कारवाई करण्यात आली आहे. याबाबतचे आदेश अप्पर पोलिस आयुक्त मनोज पाटील यांनी काढले आहेत. घोडके यांना निलंबन कालावधीत कोणतीही खासगी नोकरी करता येणार नाही आणि त्यांनी दररोज शिवाजीनगर येथील पुणे पोलिस मुख्यालय राखीव पोलिस निरीक्षक यांच्याकडे हजेरीसाठी उपस्थित राहावे असे आदेश दिले आहेत.